भक्तपुरमा सक्रिय कोरोना संक्रमित ४ हजार पुग्यो
भक्तपुर, माघ १० गते
बढ्दो कोरोना संक्रमणसँगै भक्तपुर जिल्लामा सक्रिय संक्रमितको ४ हजार पुग्न लागेको छ । पछिल्लो २४ घण्टामा संक्रमित ५३० जना सहित अहिलेसम्म जिल्लामा संख्या ३ हजार ९ सय ९८ सक्रिय संक्रमित पुगेको छ । यसरी संक्रमित हुनेहरुमा २०७० पुरुष र १ हजार ९ सय २८ महिला रहेका छन् । यसमध्ये भक्तपुर नगरमा ३७३ पुरुष र ३९२ महिला गरी ७६५ जना, चाँगुनारायण नगरमा २७१ पुरुष र १९० महिला गरी ४६१ जना यसैगरी मध्यपुर थिमी नगरमा ५८९ पुरुष र ५५८ महिला गरी ११४७ जना र सूर्यविनायक नगरपालिकामा ५४८ पुरुष र ५१४ महिला गरी १०६२ जना सक्रिय संक्रमित छन् भने २८९ पुरुष र २७४ महिला गरी ५६३ जना संक्रमितहरु सम्पर्क बिहिन अवस्थामा रहेको पनि स्वास्थ्य कार्यालय भक्तपुरले जनाएको छ ।
सक्रिय संक्रमित ३ हजार ९ सय नाघे पनि संस्थागत आइसोलेशन र अस्पतालमा रहनेहरुको संख्या भन्ने जम्मा ३१ जना मात्र रहेको कार्यालय प्रमुख कृष्णवहादुर मिजारले जारी गरेको कोरोना अपडेटमा उल्लेख छ । यसरी भर्ना हुनेहरुमा २३ जना सामान्य आईसोलेशनमा ४ जना एचडियू, ३ जना आइसियू र १ जना भेन्टिलेटरमा रही उपचारमा रहेका हुन भने अन्य संक्रमितहरु घरमै आइसोलेशनमा रहेका छन् ।
जिल्लाका कोरोना संक्रमित हुनेको कूल संखय ३४ हजार ६ सय ८२ पुगेको छ । त्यस मध्ये ३० हजार ३ सय २४ जनाले कोरोना जितिसकेका छन् भने ३६० जना संक्रमितहरुको ज्यान गएको छ । ज्यान जानेमा २ सय २८ पुरुष र १३२ महिला थिए ।
४२४ बेड तयारी अवस्थामा
जिल्लामा कोरोना संक्रमितको उपचारको लागि विभिन्न आइसोलेशन केन्द्रहरुमा २५६ वेड तयारी अवस्थामा राखिएको छ भने एचडियूको संख्या ११७, आइसियूको संख्या ३५, भेनिटलेटरको संख्या १६ गरी ४२४ बेड तयारी अवस्थामा रहेको छ ।
९३.४० प्रतिशत भक्तपुरबासीले पाए कोरोना विरुधको खोप
कोरोना विरुध ९३.४० प्रतिशत भक्तपुरबासीले विभिन्न खोप पाइ सकेको स्वास्थ्य कार्यालय भक्तपुरले जनाएको छ । यसरी खोप लिनेहरुमा २लाख ३३ हजार ७ सय ५१ रहेका छन् । भक्तपुर नगरका ८०.८० प्रतिशत, चाँगुनारायणका ८४.३३, मध्यपुर थिमीका ७८.४० र सूर्यविनायक नगरका १३१.७१ प्रतिशतले खोप पाएको जनाएको हो ।
कोरोना परीक्षण
जिल्लाभर हालसम्म ७९ हजार ६३३ जनाको पिसिआर र एन्टीजेन परीक्षण गर्दा १९ हजार ११६ जना पोजेटिभ भएको उल्लेख गर्दै स्वास्थ्य कार्यालय भक्तपुरले जनाएको छ । पिसिआर परीक्षणबाट १७ हजार १६२ र एन्टीजेनबाट १९५४ जना कोरोना संक्रमित भएको छ ।
पछिल्लो २४ घण्टामा
भक्तपुर जिल्लामा पछिल्लो २४ घण्टामा थप ५३०मा कोरोना संक्रमण देखिएको छ । स्वास्थ्य कार्यालय भक्तपुरले दिएको जानकारी अनुसार भक्तपुर नगरका ४९ पुरुष र ५१ म्हिला गरी १०० जना, चाँगु नगरका २५ पुरुष र १९ महिला गरी ४४ जना, मध्यपुर थिमीका ८८ पुरुष र ११४ महिला गरी २०२ जना र सूर्यविनायक नगरका ७३ पुरुष र ५८ महिला गरी १३१ जनामा संक्रमण पुष्टि भएको कार्यालय प्रमुख कृष्णवहादुर मिजारले जनाएको छ । कार्यालय प्रमुख मिजारका अनुसारपछिल्लो २४ घण्टामा संक्रमण पुष्टि भएका ५३० जना मध्ये २३ पुरुष र ३० महिला गरी ५३ जना सम्पर्कविहिन रहेको पनि उल्लेख गरेको छ।
