स्वतन्त्र उम्मेदवार महत्तद्वारा खत्री र पाठकलाई उजुरी
भक्तपुर, माघ ७ गते
फाल्गुण २१ गतेको प्रतिनिधी सभाको निर्वाचनकालागि हिजो मनोनयन गरीएका भक्तपुर निर्वाचन क्षेत्र नं.२मा आज दुई वटा उजुरी परेको छ । निर्वाचन आयोगको निर्वाचन कार्यतालिका अनुसार आज विहान १० बजे देखि ३ बजेसम्म उम्मेदवारको विरोधमा उजुरी दिने कार्यक्रम अन्तर्गत हिजो मनोनयन दर्ता भएका उम्मेदवारहरु माथि सो उजुरी परेको हो । यसरी मनोनयमा परेका उम्मेदवार माथि उजुरी दिने व्यक्ति पनि मनोनयनमा रहेको उम्मेदवार नै रहेको भन्दै भक्तपुर निर्वाचन क्षेत्र नं. २की निर्वाचन अधिकृत राधिका सुवालले बताएकीछिन् । उनले भनिन, भक्तपुर क्षेत्र नं. २का स्वतन्त्र उम्मेदवार नविनकुमार महत्तले राष्ट्रिय स्वतन्त्र पार्टीका उम्मेदवार राजीव खत्री विरुद्ध बेरुजुको उजुरी दिएको छ भने महत्तले नै जनसेवा नेपाल पार्टीकी उम्मेदवार जानुका पाठकमाथि पनि नागरिकता प्रतिलिपिमा फरक विवरण भएको भन्दै उजुरी दिएको छ ।
सो उजुरीमाथि भोलि जाँचबुझ गरी निर्णय लिने निर्वाचन अधिकृत सुवालले बताएकी छिन् । सो क्षेत्रमा ३२ जनाले हिजो उम्मेदवारी दिएको थियो भने भक्तपुर निर्वाचन क्षेत्र नं. १मा २५ जनाको उम्मेवारी परेको थियो । यो क्षेत्रमा कुनै पनि उजुरी नपरेको जिल्ला निर्वाचन कार्यालय भक्तपुरले जनाएको छ ।
