प्रधानन्यायाधीश जबराविरुद्ध सत्तारुढ पाँचदलीय गठबन्धनका सांसदहरूद्वारा संसदमा महाअभियोग प्रस्ताव दर्ता ।
प्रधानन्यायाधीश चोलेन्द्रशमशेर जबराविरुद्ध संसदमा महाअभियोग प्रस्ताव दर्ता भएको छ । सत्तारुढ पाँचदलीय गठबन्धनका सांसदहरूले आज बिहान ११ बजेर १० मिनेटमा संसद सचिवालयमा महाअभियोग प्रस्ताव दर्ता गराएका हुन् । माओवादी केन्द्रका प्रमुख सचेतक देव गुरुङ, नेपाली काँग्रेस सचेतक पुष्प भुसाल र नेकपा एकीकृत समाजवादीका प्रमुख सचेतक जीवनराम श्रेष्ठ प्रस्तावक रहेको महाअभियोग प्रस्तावमा कानुनमन्त्री दिलेन्द्रप्रसाद बडूसहित ९८ जना सांसदले हस्ताक्षर गरेका छन् ।
महाअभियोग लगाउनुका आधार र कारण भनेर २१ वटा बुँदा समावेश गरिएको छ । यसरी अचानक महाअभियोग प्रस्ताब दर्ता गराएकोमा नेकपा एमालेले भने आपति जनाएको छ । सीआईएनसँग कुरा गर्दै नेकपा एमालेका नेता कृष्ण भक्त पोखरेलले महाअभियोग प्रस्ताबमा एमालेले सहयोग नगर्ने र एमालेको सहयोग बिना महाअभियोग प्रस्ताब पारित नहुने दाबी गर्नुभयो । यसरी अचानक महाअभियोग प्रस्ताब ल्याउनु गलत भएको उहाँको भनाइ रहेको छ । यसअघि प्रधानन्यायधिस जबराको राजीनामा माग गर्दै नेपाल बार एशोसिएसनले लामो समयदेखि आन्दोलन गर्दै आएको छ ।
सर्वोच्च अदालतका न्यायाधीशहरूले पनि लामो समय इजलास बहिस्कार गरेका थिए । सर्वोच्च अदालतको नियमावली संशोधन गरेर गोला प्रक्रियाबाट पेशी तोक्न थालेपछि न्यायाधीशहरू बेञ्चमा फर्किएका छन् ।
