भक्तपुर, जेष्ठ २६ गते
आडिटी परीक्षणमा पोजेटिभ आएका सुत्केरीको मृत्युपछि भक्तपुर अस्पतालको सेवा प्रभावित भएको छ । पीसिआर परीक्षणको रिर्पोटको प्रतिक्षा गर्दै सुत्केरी गराउन संलग्न चिकित्सक, नर्स र कर्मचारीहरुलाई आशोलेशन वार्डमा राखिएको अस्पतालले जनाएको छ । डेलिभरीको लागि आइतवार अस्पतालमा आउँदा नै खोकी, श्वासप्रश्वासमा समस्या भएकी र जाँच गर्दा छातीमा खराबी देखिएको उल्लेख गर्दै मृतक सुत्केरीको पिसिआर रिर्पोट नआएसम्म नयाँ विरामी भर्ना नगरी अस्पताल परिसरमा सुरक्षा व्यवस्था मिलाएको जिल्ला विपद् व्यवस्थापन समितिका अध्यक्ष एवं प्रमुख जिल्ला अधिकारी हुमकला पाण्डेले जनाउनु भएको छ । हिजो ६ः१५ बजे भक्तपुर अस्पतालमै बच्चा जन्माएकी ति ३६ वर्षिय महिलाको साँझ ९ः३० बजे मृत्यु भएको अस्पतालले जनाएको छ । सुत्केरीको मृत्युपछि अस्पतालले आज साँझ प्रेस विज्ञप्ति जारी गर्दै पिसिआर रिर्पोट आएपछि जिल्ला प्रशासन कार्यालय र प्रहरी प्रशासनको समन्वयमा आवश्यक निर्णय लिने अस्पतालले जनाएको छ । सिन्धुपालचोक घर भई हाल भक्तपुरको झौखेलमा बस्दै आएकी ति मृतक महिलाले जन्मिएको बच्चा भने स्वस्थ रहेको उल्लेख गर्दै अस्पतालले मृतकसँग प्रत्यक्ष सम्पर्कमा रहेका व्यक्ति र परिवारको समेत स्वाब संकलन गरी राष्ट्यि प्रयोगशाला टेकुमा परीक्षणको लागि पठाएको जनाएको छ । सो घटनापछि नयाँ विरामी भर्ना नलिए पनि विरामीको सेवा सुचारु रहेको प्रमुख जिल्ला अधिकारी पाण्डेले जनाउनु भएको छ ।
