भक्तपुरमा नापतौल डोर कार्यक्रम सुरु
भक्तपुर ः
भक्तपुर उद्योग वाणिज्य संघको पहलमा जिल्लामा बिहीबारदेखि नापतौल डोर कार्यक्रम सुरु गरिएको छ ।
जिल्लाका उद्योगी, व्यवसायी तथा व्यापारीहरुले प्रयोग गर्दै आएको नापतौलका सामग्रीहरुको नयाँ दर्ता तथा नवीकरणका लागि गुणस्तर तथा नापतौल कार्यालय, बालाजूबाट खटिएको कर्मचारीहरुको टोलीले नापतौल डोर सञ्चालन गरेको हो । पहिलो दिन भक्तपुर नगरपालिकाको टौमढीस्थित बुल्चापाटीमा कार्यालय राखेर सञ्चालन गरिएको डोर कार्यक्रममा १०६ जना व्यवसायी, व्यापारीहरुले आआफ्ना नापतौलका सामग्रीहरु दर्ता तथा नवीकरण गरेको संघले जनाएको छ । भक्तपुर नगरभित्र डोर टोली बसे पनि जिल्लाका अन्य नगरपालिकाका व्यवसायी, व्यापारीहरु सेवा लिन आएका थिए ।
आफ्नै घरआँगनमा आफूहरुले प्रयोग गर्दै आएको नाप्ने तथा तौलने सामग्रीहरुको दर्ता तथा नवीकरण गर्न पाउँदा स्थानीय खुसी भएको संघका सचिव एवं संघले बताए । गुणस्तर तथा नापतौल कार्यालय, बालाजूबाट जिल्लामै डोर टोली खटाउँदा उद्योगी, व्यवसायी तथा व्यापारीहरु समय खर्चेर दर्ता तथा नवीकरणका लागि बालाजू पुग्नुपर्ने झन्झटबाट मुक्त भएको उनको भनाइ छ । भक्तपुर उद्योग वाणिज्य संघको पहलमा जिल्लाका उद्योगी, व्यवसायी तथा व्यापारीहरुको सहजतालाई मध्यनजर गरी विगतका वर्षहरुमा पनि डोर कार्यक्रम सञ्चालन गरेको र आगामी वर्षहरुमा पनि जिल्लाका विभिन्न स्थानमा डोर कार्यक्रम सञ्चालनलाई निरन्तरता दिन पहल गर्ने संघकी वरिष्ठ उपाध्यक्ष रोशनीमैयाँ धौबञ्जाले बताइन् ।
संघका अनुसार नापतौल डोर कार्यक्रमअन्तर्गत दोस्रो दिन २२ गते शुक्रबार कमलविनायक चोकमा डोर कार्यालय राखेर टोलीले सेवा दिने भएको छ । यसैगरी, तेस्रो दिन २४ गते आइतबार सूर्यविनायकस्थित शुभकामना पार्टी प्यालेसमा, चौंथो दिन २५ गते सोमबार नयाँथिमीस्थित शंखधर पार्टी प्यालेसमा, पाँचौं दिन २६ गते मंगलबार पुरानोथिमीस्थित मध्यपुर बैंक्वेटमा डोर कार्यालय रहने छ । त्यसैगरी, छैठौं दिन २७ गते बुधबार काशैलटार चोकमा डोर कार्यालय राखेर नापतौलका सामग्रीहरुको नयाँ दर्ता तथा नवीकरण सेवा प्रदान गरिने संघले जनाएको छ ।
व्यवसायी, व्यापारीहरुले प्रयोग गरेका नापतौलका सामग्रीहरुको नियमानुसार जाँच गरी नयाँ दर्ता तथा नवीकरण गरिदिएको गुणस्तर तथा नापतौल कार्यालय, बालाजूले जनाएको छ । नापतौलका सामग्री खरिद गरी नियमानुसार समयमै दर्ता नगराएका तथा समयमा नवीकरण नगराएका व्यवसायी तथा व्यापारीलाई जरिवाना लिएर दर्ता तथा नवीकरण गरिएको कार्यालयको भनाइ छ
