महाकाली द्योछेंको क्षेमा पूजा, भूलाछें जात्रामय
भक्तपुर, चैत्र २३ गते
भक्तपुरका प्रसिद्ध महाकाली मन्दिरको द्यो छेंको छाना मर्मत कार्य पूरा गरी आज क्षेमा पूजा आयोजना गरेको छ । भक्तपुर नगरपालिका वडा नं. ६स्थित भुलाछेंमा आज द्यो छें परिसरमा क्षमा पूजा आयोजना गरेको हो । भक्तपुर नगरपालिकाको १३ लाख लागत इष्टिमेटमा गत ३ महिना लगाएर गरेको छाना मर्मत कार्य सम्पन्न गरी आज क्षमा पूजाका साथै परम्परागत शैलीमा झण्डाटोलन समेत गरेको छ । नगरपालिकाको १३ लाख लागत इष्टिमेटलाई स्थानीय समुदायको आर्थिक, भौतिक तथा श्रमदानद्वारा निर्माण कार्य सम्पन्न गर्दा ८ लाख मात्रै खर्चेर सो मर्मत कार्य पूरा गरेको स्थानीयहरुले बताएका छन् । लागत इष्टिमेट भन्दा धेरै कम रकममा मर्मत कार्य पूरा गरी स्थानीय समुदायको आर्थिक, भौतिक सहयोगबाटै क्षमा पूजा आयोजना गरी समुहिक भोज समेत आयोजनाको तयारी भएको स्थानीयले जनाएको छ । आज दिनभर भुलाछें जात्रा मय हुने छ । द्योछें परिसरमा द्यो बो प्रदर्शनीसँगै बाजा गाजासहित महाकाली मन्दिर र आसपासका क्षेत्रमा जात्रा हुने छ । विस्का जात्रामा महाकाली र महालक्ष्मीको खत्र जात्रा समेत हुने परम्परा रहि आएको छ।
