हिउँदे वर्षापछि भएको हिमपातले किसान खुसी ।
सीता कुमाई, रेडियो कर्णाली, जुम्ला
पाखोमा लगाएको बाली सुक्ने अवस्थामा पुगेको बेला हिउँ परेपछि हिमाली क्षेत्रका किसान खुशी भएका छन् । यतिबेला परेको हिउँले जौँ, गहुँ, उवा र हिउँदे फलपूmलमा समेत सहयोग पुगेको छ । पुष महिनामा परेको हिउँको चिस्यान चैत वैशाख महिनासम्म कायम रहने हुँदा उत्पादन समेत बढ्ने किसानको अपेक्षा छ । पाखो जमिनमा लगाएको गहुँ सुक्ने अवस्थामा पुगेको बेला हिउँ परेपछि राहत भएको सिंजा गाउँपालिका वडानम्बर ५ का किसान विष्णु बहादुर रोकायाले बताउनुभयो । उहाँले पाखो जमिनमा गहुँ खेति गर्नुभएको छ । हिउँले गहुँलाई चिस्यान दिएको रोकायाको भनाइ छ । रोकाया जस्ता जुम्लाका हजारौँ किसानहरु हिउँ पर्दा खुसी भएका छन् । जुम्लाका अधिकांश पाखो जमीनमा आकाशे पानीको भरमा खेति गरिन्छ । हिउँदे बाली नसप्रिए हिमाली जिल्लाहरुमा खाद्य सङ्कट पर्ने सम्भावना रहन्छ । पुष महिनामा परेको हिउँले फलफूल लगायतका बालीमा सहयोग पुग्ने चन्दननाथ नगरपालिमा वडा नम्बर १० का किसान तुलाराम न्यौपानेको भनाइ छ । हिउँदे बालीमा लाग्ने विभिन्न किसिमको रोगकिराको सङ्क्रमणबाट समेत हिउँले बचाउने कृषि प्राविधिहरु बताउँछन् । विशेष गरी स्याउ, ओखर, आरु, नास्पति र अन्य हिउँदे फलफूलको उत्पादनमा वृद्धि हुने बताउनुहुन्छ, कृषि विकास कार्यालयका जुम्लाका कृषि प्राविधिक किरण न्यौपाने । हिउँ पछिसम्म पनि रहिरहने भएकाले हिउँदे बाली फस्टाउने भन्दै जुम्लाका किसानहरु खुसी भएका छन् । यो वर्ष जुम्लामा गत वर्षकेै भन्दा हिउँदे बाली दोब्बरले वृद्धि हुने अपेक्षा गरिएको छ ।
