भक्तपुर नगरपालिकाका जनप्रतिनिधिसँग बालबालिका कार्यक्रम ।
२०७८ भदौ ३१, बिहीबार
राष्ट्रिय बाल दिवसको अवसरमा भक्तपुर नगरपालिका वडा नं. ३ को आयोजनामा कोभिड १९ संक्रमणले बालबालिकामा परेको प्रभाव विषयमा जनप्रतिनिधिसँग बालबालिका कार्यक्रमको आयोजना भयो ।
कार्यक्रममा बोल्नुहुँदै भक्तपुर नगरपालिकाका उपप्रमुख रजनी जोशीले राष्ट्रिय बाल दिवसको अवसरमा भक्तपुर नगरपालिकाले नगरका सबै वडाहरुमा रचनात्मक कार्यक्रमहरु आयोजना गर्दै आइरहेको बताउनुभयो ।
उहाँले शिक्षा, स्वास्थ्य, पौष्टिक आहार, अनूकूल वातावरण आदि बालबालिकाहरुको नैसर्गिक अधिकार भएको बताउनुहुँदै बालबालिकाहरुलाई बाल अधिकारबारे समयमै सजग र सचेत बनाउँदै लानु आवश्यक भएको बताउनुभयो ।
बालबालिकाहरुलाई स्थानीय भाषामा पोख्त बनाउनुपर्नेमा जोड दिनुहुँदे उपप्रमुख जोशीले भक्तपुर नगरपालिका देशकै सानो नगरपालिका भए पनि शिक्षा, स्वास्थ्य, सरसफाईलगायतका क्षेत्रमा अग्रणी स्थानमा रहेको बताउनुभयो ।
शिक्षा भनेको घोकन्ते विद्या होइन भन्दै उहाँले विद्यार्थीहरुलाई अनुशासित, इमानदार र स्वाबलम्बी हुन सिकउनुपर्छ भन्नुभयो । भक्तपुर नगरपालिकाले गरिब तथा जेहेनदार विद्यार्थीहरुको लागि छात्रवृत्ति, शैक्षिक ऋणलगायतका सुविधाहरु प्रदान गर्दै आइरहेको अवगत गराउनुहुँदै उहाँले नगरबासीहरुको स्वास्थ्यलाई ध्यानमा राख्दै सुविधायुक्त ख्वप अस्पताल सञ्चालनमा ल्याएको बताउनुभयो ।
भक्तपुर नपा वडा नं. ३ का वडाध्यक्ष राजकृष्ण गोराले शिक्षालाई उच्च प्राथमिकतामा राखी ६ वटा शिशुस्याहार, ७ वटा शैक्षिक संस्था सञ्चालन गर्दै आइरहेको बताउनुहुँदै विभिन्न खेलकुद प्रतियोगिता तथा अतिरिक्त क्रियाकलापलाई पनि निरन्तरता दिँदै जाने बताउनुभयो ।
कार्यक्रममा उपस्थित विभिन्न विद्यालयबाट प्रतिनिधित्व गरेका विद्यार्थीहरुले कोभिड १९ बाट आफूहरुलाई परेका समस्या, कोभिड नियन्त्रणमा भक्तपुर नपाको भूमिका र भौतिक उपस्थितिमा विद्यालय सञ्चालन विषयमा आफ्नो जिज्ञाशाहरु राख्नुभएको थियो ।
उक्त कार्यक्रममा कार्यपालिका सदस्य सुनिता अवाल र कृष्णगोपाल चौगुठीले पनि बोल्नुभएको थियो ।
