भक्तपुर, चैत्र २०गते
ब्लड डोनर्स एशोसियशन नेपालले लक डाउनको समयमा पनि घरडैलो रगत संकलन कार्य जारी राखेको छ । उपचारमा रहेका विरामीहरुलाई अतिआवश्यक रगत जोह गर्न काठमाण्डौ उपत्यकाका विभिन्न क्षेत्रमा पुगेर खुल्ला रक्तदान कार्यक्रम गरी एशोसियसनले रगत संकलन अभियान सञ्चालन गरिरहेको हो । बुधबार मध्यपुर थिमीमा १९ यूनिट रगत संकलन गरेको एशोसियशनले आज भक्तपुरको भौखेलमा २४, ब्यासीमा २२ र काठमाण्डौको डल्लुमा ३१ यूनिट गरी ७७ यूनिट रगत संकलन गरेको छ । रक्त सञ्चार सेवा केन्द्र भक्तपुरको प्राविधिक सहयोगमा खुल्ला रक्तदान कार्यक्रम आयोजना गरी रगत संकलन अभियान सञ्चालन भएको हो ।
अस्पतालमा उपचारत विरामीहरुका लागि दैनिक सय देखि १२५ यूनिट रगत माग भइरहेको भन्दै केन्द्रका प्राविधिक दामोदर मुनकर्मीले ब्लड डोनर्स एशोसियशनको रगत संकलन अभियानले लकडाउनको समयमा पनि आवश्यक रगत ब्यवस्थापन गर्न सजिलो भइरहेको बताएको छ । कोरना भाइरसको विश्वव्यापी संक्रमणको जोखिमलाई ख्याल गर्दै समाजिक दुरी कायम गरी तथा आवश्यक सुरक्षा व्यवस्थाका साथ लक डाउनको समयमा पनि रगत संकलन भइरहेको हो । यो बेला रगतदान गरी मानविय सहयोग गर्न चाहने महानुभावहरुले रक्त सञ्चार सेवा केन्द्र भक्तपुरमा सम्पर्क राख्न पनि अनुरोध गरेको छ ।
