परीक्षण कम हुँदा सङ्क्रमण पुष्टि हुने घटे, २४ घण्टामा थपिए ८३६ सङ्क्रमित ।
परीक्षण कम भएसँगै कोरोना पुष्टि हुनेको सङ्ख्या पनि घटेको छ । गत २४ घण्टामा ६ हजार ६ सय ५४ जनाको परीक्षण गर्दा ८ सय ३६ जनामा सङ्क्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ । मन्त्रालयका अनुसार २४ घण्टामा सङ्क्रमण पुष्टि भएकोभन्दा दोब्बर बढी निको भएका छन् । गत २४ घण्टामा १ हजार ८ सय २६ जना सङ्क्रमण मुक्त हुँदा ४ जनाको भने मृत्यु भएको छ ।
योसँगै नेपालमा सक्रिय सङ्क्रमितको सङ्ख्या २६ हजार १ सय २ मा झरेको छ । अहिलेसम्म पीसीआर विधिबाट परीक्षण गरिएका मध्ये ९ लाख ७२ हजार ६ सय ३२ जनामा कोरोना पुष्टि भएको छ । जसमध्ये ९ लाख ३४ हजार ६ सय ४८ जना निको भएका छन् । अहिलेसम्म नेपालमा कोरोनाले ११ हजार ८ सय ८२ जनाको भने मृत्यु भएको मन्त्रालयले जनाएको छ ।
