आदर्शमा सवारी दुर्घटनाबाट पैदलयात्रीको मृत्यु
भक्तपुर, बैशाख २१ गते
हिजो राती आदर्श चोकमाभएको सवारी दुर्घटनाका घाइते पैदलयात्रीको मृत्यु भएको प्रहरीले जनाएको छ । भक्तपुर नगरपालिका वडा नं. ५ स्थित आदर्श बसस्टेशन क्षेत्रमा सूर्यविनायकबाट जगातीतर्फ आउँदै गरेको बा ४ ख ३१५६ नं. को टिपरले बाटो काट्दै गरेको पैदलयात्री विसुनदेव सहनीलाई ठक्कर दिँदा गम्भिर घाइते भइ उपचारकालागि भक्तपुर अस्पताल दुधपाटी लगिएकोमा उपचारकैक्रममा सहनीको मृत्यु भएको भक्तपुर प्रहरीले जनाएको छ । मृतक सहनी भारत दरभंगा जिल्ला धोहीघाट घर भई हाल चाँगुनारायण नगरपालिका वडा नं. ८ सुडाल स्थित वि.एम ईट्टा भट्टामा काम गर्ने वर्ष ४३को भएको प्रहरीले जनाएको छ । जिल्ला प्रहरी कार्यालय भक्तपुरका निमित्त सूचना अधिकारी स्वरुप शर्माले आज एक विज्ञप्ति जारी गर्दै पैदलयात्री सहनीको मृत्यु पुष्टि गरेका हुन । सूचना अधिकारी शर्माका अनुसार सो घटनाका टिपर चालक श्यामकुमार तामाङलाई नियन्त्रण्मा लिई प्रहरी वृत्त जगाती भक्तपुरबाट थप अनुसन्धान कार्य भइरहेको जनाएको छ ।
