जसको मौलिकता गुम्छ उसले सबथोक गुमाएको हुन्छ
सुनिल प्रजापति, प्रमुख भक्तपुर नगरपालिका
पुरातत्व विभागले भक्तपुर नगरपालिकालाई पनि यस कार्यक्रममा आमन्त्रण गरेर केही कुरा राख्ने अवसर दिनुभएकोमा म सांस्कृतिक नगर भक्तपुरको तर्फबाट पुरातत्व विभागका महानिर्देशकज्यू लगायत सबैलाई हार्दिक धन्यवाद दिन चाहन्छु । सर्वप्रथम बैठकको पूर्ण सफलताको निम्ति शुभकामना व्यक्त गर्दछु ।
२०७२ सालको भूकम्प गएको ७ वर्ष बित्यो । यस अवधिमा धेरै निजी घरहरु र सम्पदाहरु बने, अझै कयौं घर र सम्पदाहरु पुनःनिर्माण र जीर्णोद्धार गर्न बाँकी छन् । बैठकले भूकम्पवाट क्षतिग्रष्ट बाँकी सम्पदाहरुको पुनःनिर्माणको विषयमा केन्द्रित भएर छलफल गर्ने र व्यवस्थित योजना तयार गरी शिघ्र पुनःनिर्माणको लागि अगाडि बढ्न मार्ग स्पष्ट गर्ने आशा गर्दछु ।
हामी विश्व सम्पदा सूचिमा सूचिकृत नगरहरुबाट यहाँ प्रतिनिधित्व गर्दैछौं । विश्व सम्पदामा सूचीकृत काठमाडौं दरबार क्षेत्र, बौद्ध, ललितपुर दरबार क्षेत्र, भक्तपुर दरबार क्षेत्र, चाँगुनारायण मन्दिर क्षेत्र भएका स्थानहरुबाट प्रतिनिधित्व गर्न पाउँदा हामीलाई खुशी लाग्छ । यति छोटो दुरीमा यति धेरै विश्व सम्पदा सूचीमा सूचीकृत सम्पदाहरु भएको ठाउँ विश्वमा सायदै होलान् । तापनि हाम्रा सम्पदाहरुको पुनःनिर्माण र जिर्णोद्वारतर्फ केन्द्रीय सरकारको उचित ध्यान नपुग्नु विडम्बनाको कुरा हो ।
तीव्र गतिमा भइरहेको जनसंख्या वृद्धि, अनियन्त्रित सहरीकरण र आधुनिक विकास निर्माण सम्पदा संरक्षणको निम्ति चुनौती बन्दैछ । संघ, प्रदेश र स्थानीय तहबीच समन्वय गरी एकीकृत योजना बनाएर अघि बढेमा मात्रै हाम्रा सबै सम्पदाहरु व्यवस्थित रुपमा संरक्षण गर्न सम्भव हुन्छ ।
म भक्तपुरबाट प्रतिनिधित्व गर्दैछु । भक्तपुर २०७२ सालको भूकम्पबाट धेरै धनजनको क्षतिभएको जिल्लामध्ये एक हो । भक्तपुर नगरपालिकामा पूर्ण र आंशिक गरी करिब ८ हजार निजी घरहरु र १३० वटाभन्दा बढी सम्पदा क्षति भएको थियो ।
भूकम्पबाट क्षत विक्षत अबस्थामा २०७४ सालको स्थानीय निर्वाचनमा हामी निर्वाचित भयौं । सम्पदा संरक्षणलाई प्राथमिकतामा राख्दै क्षतिग्रष्त सम्पदाहरुको पुनःनिर्माण र जीर्णोद्धारलाई अगाडि बढायौं । हाम्रो ५ वर्षको कार्यकालमा १२४ वटा सम्पदा पुनःनिर्माण र जीर्णोद्धार कार्य लगत इस्टमेटभन्दा निकै कम खर्चमा सम्पन्न भयो । हामीले स्थानीय उपलब्ध स्रोत र साधनको अधिकतम प्रयोगलाई जोड दिंर्दै मौलिक प्रविधिबाट स्थानीय जनसहभागितामा पुनःनिर्माण कार्य गर्दै आर्यौं । यसले सम्पदाहरुप्रति जनताको अपनत्व हुने, निर्माण कार्य गुणस्तरीय हुने, मौलिक सीप र प्रविधिको संरक्षण हुने तथा स्थानीय जनताले रोजगारी पाउने हुँदा यो निर्माण शैली नै सम्पदा पुनःनिर्माणको उपयुक्त विकल्प हो भने हाम्रो निस्कर्ष हो । भक्तपुर नगरपालिकाले यस शैलीलाई निरन्तरता दिंदै आएको छ । ठूल्ठूला भूकम्पबाट पनि नभत्केको उपत्यकाको सबभन्दा अग्लो ५ तले मन्दिर ३२० वर्षदेखि जस्ताको तस्तै ठडिएर रहनु हाम्रो मौलिक प्रविधिको उत्कृष्टताको उदाहरण हो । ३२० वर्ष जस्ताको तस्तै ठडिएको भक्तपुरको ५ तल्ले मन्दिरलगायतका सम्पदाहरुले हाम्रो मौलिक प्रविधिको उत्कृष्टतालाई देखाउँछ ।
महत्वपूर्ण सम्पदा पुनःनिर्माण वा जीर्णोद्धार अघि विज्ञ टोलीबाट सम्पदाको ऐतिहासिक, सांस्कृतिक र पुरातात्विक महत्वबारे अध्ययन प्रतिवेदन र प्राविधिकहरुबाट अलग्गै प्राविधिक प्रतिवेदन तयार गर्ने र त्यसपछि मात्रै पुनःनिर्माण कार्यलाई अगाडि बढाउने गर्दै आएका छौं । यसबाट प्राचीन प्रविधिबारे नयाँ पुस्तालाई जानकारी प्राप्त हुने र सम्पदा संरक्षणमा मदत पुग्ने हाम्रो विश्वास छ ।
भक्तपुर नपाले मूर्त सम्पदाहरुका साथै अमूर्त सम्पदाहरुको संरक्षणमा पनि उत्तिकै ध्यान दिइरहेको छ । हरेक वर्ष विभिन्न सांस्कृतिक विधाको प्रतियोगिताको आयोजना, साँस्कृतिक गुरुहरुको सम्मान र विभिन्न सांस्कृतिक समूहहरुलाई आर्थिक अनुदानको व्यवस्था यसका उदाहरणहरु हुन् ।
हाम्रो भाषा र संस्कृतिको महत्वबारे नयाँ पुस्तालाई बुझाउनु पनि हाम्रो महत्वपूर्ण काम हो । त्यसको लागि स्थानीय पाठ्यक्रम बनाइ लागू गर्यौं । भाषा र संस्कृतिबारे नयाँ पुस्तालाई अध्ययन, अध्यापन गराएनौं भने त्यो लोप भएर जानेछ । कुनै भाषा वा संस्कृति लोप हुनु भनेको राज्यको सम्पत्ति समाप्त हुनु हो । त्यसको संरक्षण र सम्बद्र्धन गर्नु सबैको साझा जिम्मेवारी हो । पुरातत्व विभागले यसबारे बिशेष पहल गर्नु आवश्यक छ । नेपाल सरकारले पालिका स्तरमा भाषा र सँस्कृति सम्बन्धी सङ्ग्रहालय बनाउनेतर्फ ध्यान दिनु जरुरी छ ।
उचित संरक्षणको अभावमा हाम्रा थुप्रै सम्पदाहरु लोप भए, अझै कयौं सम्पदाहरु लोपोन्मुख अवस्थामा छन् । हरेक सम्पदाको आ आफ्नै ऐतिहासिक, सांस्कृतिक र पुरातात्विक महत्व हुन्छ । काठमाडौं उपत्यकामा अवस्थित लिच्छविकालीन र मल्लकालीन संस्कृति र सम्पदाहरु विश्वस्तरीय छन् । भक्तपुरको चाँगुनारायण, पाँचतल्ले मन्दिर, पचपन्न झ्याले दरबार, सुनढोका वास्तुकलाको दृष्टिले अनुपम उदाहरणहरु हुन् । त्यसका अवलोकनका लागि हरेक वर्ष विश्वका लाखौं पर्यटकहरु नेपाल आउने गर्छन् । पर्यटन क्षेत्रको विकासमा सम्पदाहरुको उल्लेखनीय भूमिका रहेको हामीले बिर्सनु हुँदैन ।
त्यस्ता महत्वपूर्ण सम्पदाहरुको पुनःनिर्माण वा जीर्णोद्धार ठेक्कामार्फत गराइदा त्यसको मौलिकता हराउन सक्छ । ठेकेदारले सम्पदाको मूल्य र महत्व बुझ्दैन वा बुझ्न चाहन्दैन । उसले नाफालाई मात्रै ध्यान दिन्छ । ठेकेदारको नाफासँग हाम्रा सम्पदाहरुको महत्व साट्न मिल्दैन । त्यसैले कुनै पनि सम्पदा पुनःनिर्माणको काम स्थानीय जनतामार्फत गर्ने कानुनी बन्दोबस्त हुनु आवश्यक छ । अहिले प्रचलित आर्थिक ऐन, नियमहरु सम्पदा पुनःनिर्माणको लागि बाधक बनिरहेका छन् ।
पुरातात्विक क्षेत्रहरुको अध्ययन, अनुसन्धानलाई जारी राख्नुपर्छ । सिन्धुघाटी, हरप्पा र मोहन्जोदाडोको पुरातात्विक उत्खननले प्राचीन कालमा त्याहाँ कस्तो नगर योजना थियो, तत्कालीन वास्तुकला र कलाको विकास, आर्थिक र सामाजिक जीवन तथा धार्मिक अवस्था कस्तो थियो भनी बुझ्न सजिलो भए झैं काठमाडौं उपत्यकाका लिच्छविकालीन र मल्लकालीन सम्पदाहरुको अध्ययन अनुसन्धानले नयाँ नयाँ तथ्यहरु पत्ता लागाउन मदत गर्नेछ । हाम्रो ध्यान त्यसतर्फ केन्द्रित हुनु आवश्यक छ ।
भक्तपुर दरबार क्षेत्रमा अवस्थित कला सङ्ग्रहालय रहेको न्ह्यकं झ्या दरबार अझै पुनःनिर्माण हुन सकेको छैन । त्यसबारे थुप्रै प्रश्नहरु उठ्ने गरेका छन् । प्राप्त प्रमाणको आधारमा मल्लकालीन शैलीमा बनाउनमा भक्तपुर नगरपालिका, पुरातत्व विभाग र संस्कृति मन्त्रालयको संयुक्त बैठकले मिति २०७५।४।८ मै निर्णय गरिसकेको थियो । युनेस्कोको अनुमति नभएको भन्दै पुनःनिर्माणको काम कहीबाट पनि अगाडि बढेको देखिएन किन ? देशको सम्पदाप्रति पुरातत्व विभागले चासो लिएर पुनःनिर्माणको काम अगाडि बढाउनु पर्ने होइन ? सबै काम स्थानीय तहले गर्ने हो भने पुरातत्व विभागको औचित्यमाथि पनि प्रश्न उठ्छ । दरवार हेरचाह तथा स्मारक संरक्षण कार्यालय, गुठी संस्थानलाई स्थानीय तह अन्तर्गत राख्न सकेमा काम छिटो छरिटो गर्न सकिन्छ ।
अहिले नेपालमा विदेशी संस्कृतिको प्रभाव बढ्दै गएको छ । मौलिकताको संरक्षण गर्दै संस्कृतिको नाउँमा हुने वैदेशिक हस्तक्षेप रोक्नु हाम्रो लागि ठूलो चुनौती बनेको छ । सुधारको नाउँमा गरिएका कतिपय कामले हाम्रो मौलिकतालाई ठाडै चुनौती दिएको छ । मौलिकता हाम्रो पहिचान हो । जसको मौलिकता गुम्छ उसले सबथोक गुमाएको हुन्छ । त्यसैले मौलिक सम्पदा र संस्कृतिको महत्व बोध गराउने, त्यसप्रति निष्ठा जगाउने र मौलिक संस्कृति र सभ्यताबारे विद्यालय, कलेजको पाठ्यक्रममा समावेश गर्नुपर्ने आवश्यकता छ ।
सम्पदा पुनःनिर्माण र जीर्णोद्धारका लागि सहज काठ उपलब्ध गराउने, जनसहभागितामा सम्पदाहरुको पुनःनिर्माणको लागि आवश्यक ऐन नियमको बन्दोबस्त गर्ने, तिनै तहका सरकारहरुबीच समन्वयको संयन्त्र निर्माण गर्ने र स्थानीय सीप र प्रविधिबारे सघन तालिमको बन्दोबस्त गर्ने तथा परम्परागत शैलीमा घर निर्माण गर्नेलाई अनुदानको व्यवस्था गर्ने कानुनी बन्दोबस्त गर्न सके हाम्रा सम्पदाहरु संरक्षणमा सहयोग पुग्ने छ ।
भक्तपुर नपाले सम्पदा पुनःनिर्माणमा आर्थिक अनुशासन, मितव्ययिता र पारदर्शितालाई ध्यानमा राखी काम गर्दै आएको छ । आवश्यकताअनुसार जनशक्ति तयार गर्न सिकर्मी, डकर्मी, लोहँकर्मीहरुको नियमित तालिमको व्यवस्था गर्दै आएको छ । त्यसैगरी पुरानो नगर क्षेत्रभित्र मौलिक शैलीमा घर बनाउने घर धनीहरुलाई काठ, इटा र झिंगतिमा लाग्ने खर्चको ३५ प्रतिशत अनुदान प्रदान गर्दै आएको छ ।
भक्तपुरको प्राचीन सहरी क्षेत्रभित्र स्थानीय जनताले मात्र घर जग्गा किनबेच गर्न सक्ने कानूनी बन्दोबस्त गर्न खोज्यौं । तर त्यसको लागि अदालत बाधक बन्यो । देशका महत्वपूर्ण सम्पदाहरुको संरक्षण गर्न सम्पदा रहेको महत्वपूर्ण क्षेत्रका जग्गा किनबेचमा रोक लगाउने कानुनी बन्दोबस्त गर्न र काठमाण्डौ उपत्यकालाई साँस्कृतिक केन्द्रको रुपमा विकास गर्न आवश्यक पहल गर्न पनि अनुरोध गर्दछु ।
(काठमाडौँ उपत्यका विश्व सम्पदा स्थलको संरक्षण एवं व्यवस्थापन विषयमा चैत्र ९ गते भएको इन्टरनेसनल साइन्टिफिक कमिटी बैठकको उद्घाटन कार्यक्रममा भक्तपुर नगरपालिकाका नगर प्रमुख सुनिल प्रजापतिको मन्तव्य)