समस्याको निकासका लागि प्रधानन्यायाधीशसँग फेरि वार्ता गर्ने न्यायाधिसहरुको निर्णय ।
प्रधानन्यायाधिसको राजीनामा माग गर्दै आएका सर्वोच्च अदालतका न्यायाधीशहरूले समस्याको निकासका लागि प्रधानन्यायाधीशसँग फेरि वार्ता गर्ने निर्णय गरेका छन् । सर्वोच्च अदालतका न्यायाधीशहरुको आज बसेको बैठकले प्रधानन्यायाधीश चोलेन्द्र शमशेर जबरासँग भोली छलफल गर्ने निर्णय गरेको हो । छलफलका लागि वातावरण बनाउन आज नै केही न्यायाधीशले प्रधानन्यायाधीशसँग भेट गरी बैठकको निर्णयबारे जानकारी दिएका छन् ।
न्यायाधीशहरुको बैठकले प्रधानन्यायाधीशले राजीनामा दिएर बहिर्गमन हुनु नै उपयुक्त निकास भएको ठहर समेत गरेको छ । यसका लागि प्रधानन्यायाधीशले केही समय मागेको खण्डमा समय दिने निर्णयसमेत भएको बताइएको छ । न्यायाधीशहरुले आज प्रधानन्यायाधीश चोलेन्द्रशम्शेर जबरासँग वार्ता गर्न ३ न्यायाधीशलाइ जिम्मा दिने निर्णय पनि गरेका छन् । प्रधानन्यायाधीश जबरासँग वार्ताका लागि न्यायाधीश अनिलकुमार सिन्हा, सपना प्रधान मल्ल र डा. मनोजकुमार शर्मालाई जिम्मा दिने निर्णय भएको छ । उनीहरुलाई प्रधानन्यायाधीश जबराको बहिर्गमन कसरी सहज हुन्छ भन्ने विषयमा छलफल गर्ने जिम्मेवारी दिइएको छ ।
