प्रधानन्याधिशको राजिनामा माग गर्दै नेपाल बार एशोसिएसन धर्नामा ।
प्रधानन्यायाधीश चोलेन्द्रशमशेर जबराको राजीनामा माग्दै आज नेपाल बार एशोसिएसनले सर्वोच्च अदालत परिसरमा धर्ना दिएको छ । न्यायालयको गरिमा कायम राख्न नसक्ने प्रधानन्यायाधीशले राजीनामा दिनुपर्ने माग सहित बारका कानुन व्यवसायीहरू धर्नामा बसेका हुन् । धर्ना कार्यक्रममा बरिष्ठ अधिवक्तासहितका कानुन व्यवसायीहरूको सहभागीता रहेको थियो । नेपाल बार एशोसीयसनले कात्तिक १७ गतेसम्म बिरोधको कार्यक्रम जारी रहने बताएको छ । कानुन व्यवसायीहरूले आज हातमा कालोपट्टीसमेत बाँधेका छन् । प्रधानन्यायाधीश चोलेन्द्र शम्शेर जबराको राजीनामा माग्दै प्रदर्शनमा उत्रिएका कानुन व्यवसायीहरुले आफूहरूको आन्दोलन कुनै व्यक्तिविरुद्ध नभई न्यायपालिका शुद्धीकरणको लागि भएको बताएका छन् ।
न्यायालय शुद्धीकरणको लागि प्रधानन्यायाधीशको राजीनामा पहिलो शर्त भएको पनि उनीहरूले बताएका छन् । विवादमा मुछिएका उहाँले निकास दिनु पर्ने भन्दै सर्वोच्चका अरू न्यायाधीशहरूले इजलासमा बस्न इन्कार गरेका थिए । मन्त्रिपरिषदमा भागबन्डा खोजेको, न्यायालय सुधारमा अवरोध गरेको लगायत विषयमा अहिले प्रधानन्यायाधीश जबराको आलोचना भइरहेको छ । सर्वोच्चमा उहाँ बाहेक सबै न्यायाधीश एकातिर भएका छन् ।
यसैबीच प्रधानन्यायाधीश चोलेन्द्र शमशेर जबरा भने आज इजलास राख्नुभएको छ । सर्वोच्च अदालतका सबैजसो न्यायाधीश तथा नेपाल बार एशोसिएसनले प्रधानन्यायाधीश जबरालाई राजीनामाका लागि दबाव दिँदै इजलासमा नबस्न चेतावनी दिएपनि प्रधानन्यायाधिश जबराले आज इजलास सञ्चालन गर्नुभएको हो ।
सर्वोच्च प्रशासनका अनुसार आज ३ बजे एकल इजलासमा पुग्नुभएका प्रधानन्यायाधीस जबराले नेपाली सेनाको सैनिक विशेष अदालतमा पुगेको मुद्दा जोडिएको क्षेत्र अधिकारको विषयमा प्रारम्भिक सुनुवाइ गर्नुभएको छ । महान्याधिवक्ता कार्यालयले दर्ता गरेको रिट निवेदनमा सरकारी वकिलहरूले वहस गरेका थिए । प्रारम्भिक सुनुवाइमा स्वतन्त्र कानुन व्यवसायीहरुको वहस आवश्यक नपर्ने भएकाले सरकार वकिल पक्ष मात्रै सम्मेलित हुँदा पनि प्राधानन्यायाधीश जबरालाई सहज भएको हो ।
