कटुञ्जे गडेधारास्थित घट्टेखोलाको नयाँ पुल उद्घाटन
भक्तपुर । सूर्यविनायक नगरपालिका–५ कटुञ्जेस्थित गडेधारा टोलमा अवस्थित घट्टेखोलाको नयाँ पुल सूर्यविनायक नगरपालिकाका वडा नं. ५का वडाध्यक्ष राजकुमार जोशीको प्रमुख आतिथ्यतामा पूर्व न्यायाधिस विनोद शर्माले उद्घाटन गर्नुभएको छ । गतअसार महिना वर्षाको समयमा भाँचिएको उक्त पुल सूर्यविनायक नगरपालिका वडा नं.५ले ४ लाख बजेट छुटाए लगत्तै १ हप्तामै पुल निर्माण गरी स्थानीयबासीलाई आवतजावतमा सहजता भएको वडाध्यक्ष राजकुमार जोशीले बताउनुभयो । उहाँले नगरपालिका, वडा र प्रदेशदेखि बजेट पारित भई यस घट्टेखोलामा करिडोर निर्माण हुँदैछ र यो पनि समयमै निर्माण सम्पन्न हुने विश्वास राखेको बताउँदै यस गडेधारा टोलमा महिला दिदीबहिनीहरुलाई महिला उद्यमशीलता तालिम दिने र सिसिटिभी क्यामरा पनि चाँडै जडान गर्ने जानकारी दिनुभयो ।
त्यस्तै पूर्व न्यायाधिस विनोद शर्माले नयाँ पुल निर्माण गर्नका निमित्त वडाध्यक्ष, टोलबासीको लगनशीलता उदाहरणीय रहेको बताउनुभयो । उहाँले उपस्थित सम्पूर्ण टोलबासीहरुलाई आपसी समझदारी र वडाको हरेक कार्यमा साथ दिएकोमा धन्यवाद व्यक्त गर्दै आफूले पनि आफ्नो तर्फबाट यस गडेधारा टोललाई सदैव साथसहयोग गर्ने प्रतिवद्धता जनाउनुभयो ।
उद्घाटन समारोहमा समाजसेवी अनिता पाण्डे, युवराज घिमिरे, वडा सदस्य एवं टोलबासीहरुको उपस्थिति रहेको थियो भने पुल निर्माण कार्यमा आफ्नो योगदान दिनुहुने व्यक्तित्वहरुलाई खादा लगाएर सम्मान पनि गरिएको थियो ।
