हैजा फैलिएको बारे भक्तपुरमा भ्रम !
भक्तपुर, श्रावण २० गते
हैजा बारे भक्तपुरमा भ्रम फैलिएको छ । बर्षातको समयमा हैजा जस्तो संक्रामक रोग फैलिन सक्ने डर रहे पनि हालसम्म भक्तपुरमा हैजा संक्रमण पुष्टि भएको छैन । यद्यपी विभिन्न सामाजिक सञ्जालमा हैजा फैलियो भन्दै जारी सन्देशहरुले जनमानसमा भ्रम फैलिएको प्रति जनस्वास्थ्य कार्यालय भक्तपुरले आपति जनाएको छ । ललितपुर, काठमाण्डौ र कैलालीमा मात्रै हालसम्म हैजा फैलिएको पुष्टि भएको भन्दै जनस्वास्थ्य कार्यालय भक्तपुरका कार्यालय प्रमुख अस्मिता ओझाले भक्तपुरमा हालसम्म हैजा पुष्टि नभएको बताउनु भयो । भक्तपुरमा हैजा पुष्टि भयो भनिएका व्यक्ति ललितपुरको किस्ट अस्पतालमा कार्यरत व्यक्ति भएको र उनको बासस्थान र खानपिन समेत त्यतै भएकाले सो केसको आधारमा भक्तपुरमा हैजा पुष्टि नभएको कार्यालय प्रमुख ओझाले बताउनु भयो । उहाँले वर्षातको समयमा जनमानसमा हैजाका जीवाणु कुनै पनि बेला संक्रामक रुपले फैलिन सक्ने भएकाले खानेपानी शुद्धीकरण र ढल व्यवस्थापनको खाँचो औल्याउँदै हैजा र डेंगु जस्तो संक्रामक रोगहरुबाट सुरक्षित व्यवहारमा रहन सवै साधारणमा आग्रह गर्नु भएको छ ।
