अन्य ब्यक्तिको ट्रायल दिने ५ जना पक्राउ
भक्तपुर, भाद्र २३गते
महानगरीय प्रहरी परिसर भक्तपुरले अन्य ब्यक्तिहरुको ट्रायल दिने कार्यमा संलग्न भएको भन्दै ५ जना अभियुक्तलाई पक्राउ गरेको छ । मध्यपुर थिमी स्थित राधे राधेको ईजी वे ट्रायल सेन्टरमा नक्कली नागरिकता र नक्कली प्रवेश पत्र बनाई अन्य ब्यक्तिहरुको ट्रायल दिने कार्यमा संलग्न ५ जनालाई पक्राउ गरिएको परिसरका सूचना अधिकारी राजु पाण्डेले जनाएको हो । यसरी पक्राउ पर्नेहरुमा सिन्धुली घर भई हाल चाबहिल काठमाण्डौ र कोटेश्वर बस्ने मनिष श्रेष्ठ र मनिष लामिछाने, टुल्कु सिं तामाङ, कालिकोट स्थायी घर भई हाल कटुञ्जे भक्तपुर बस्दै आएकाइन्द्रबहादुर शाही र गोर्खाका राजकुमार श्रीमल रहेको प्रहरीले जनाएको छ । २० देखि २४ वर्ष उमेर समूहका यी युवाहरुले अन्य ब्यक्तिको सवारी चालक अनुमति पत्र लिन ट्रायल परीक्षा दिन नक्कली नागरिकता र नक्कली प्रवेश पत्र बनाई लिखत सम्बन्धि कसुर गरेको भन्दै प्रहरीले बिहिबार पक्राउ गरेको हो । पक्राउ परेका ति युवाहरुको साथबाट प्रहरी वृत्त ठिमीबाट खटिएको प्रहरी टोलीले नक्कली नागरिकताहरु, पासपोर्ट, प्रबेश पत्रहरु, बिभिन्न रसिद, ल्यापटप, नक्कली नागरिकता बनाउन प्रयोग गरिने कागजात र मोबाईल सहित नियन्त्रणमा लिएको छ । तिनीहरुलाई लिखत सम्बन्धि कसुरमा मुद्दा दर्ता गरी थप अनुसन्धान भइरेको सूचना अधिकारी पाण्डेले जनाएको छ ।
