भक्तपुर कप फुटबलको तयारी पूरा, उद्घाटन भोलि हुने
भक्तपुर, फाल्गुण ५ गते । भक्तपुर कप फुटबल २०७८को तयारी पूरा भएको आयोजक भक्तपुर युवा टिमले जनाएको छ । शुक्रबारबाट सुरु हुने सो प्रतियोगिताको उद्घाटन भोली दिउँसो १ बजे बागमती प्रदेशका प्रदेश सांसद सुरेन्द्रराज गोसाईबाट हुने कार्यक्रम तय भएको संस्थापक अध्यक्ष विश्वराम कवांले जनाएको छ । फागुन १४ गतेसम्म आयोजना हुने सो प्रतियोगिताको मंगलबार नै एक कार्यक्रम बीच टाइसिट सार्वजनिक गरिसकेको थियो । सो टाइसिट अनुसार उद्घाटन खेल आयोजक युवा टिम भक्तपुर र नमस्ते बनेपा फुटबल क्लब बनेपाबीच हुने छ । सो प्रतियोगिताको सम्पूर्ण तयारी पूरा भएको उल्लेख गर्दै सचिव रामेश्वर मचामसिले प्रतियोगितामा १६ वटा टिम सहभागि हुने जनाएको छ ।
प्रतियोगितामा पहिलो र दोश्रो हुने टिमलाई आकर्षक नगद पुरस्कारको व्यवस्था गरिएको आयोजक टिमका अध्यक्ष केशव त्वायनाबासुले जनाएको छ । पहिलो हुने टिमलाई नगद रु एक लाख १५ हजार र दोश्रो हुने टिमलाई नगद रु ५५ हजार पुरस्कारको व्यवस्था रहेको छ । साथै प्रतियोगितामा उत्कृष्ट खेलाडी, अग्रखेलाडी, मिडफिल्डर, डिफेन्डर, गोलकिपर, कोचलाई पनि वेष्ट अवार्ड दिने योजना रहेको छ ।
भक्तपुर कप फुटबल २०७८मा काठमाडौं बाहिरको टिमहरुले पनि सहभागिता जनाउने छन् । प्रतियोगितामा काठमाडौं, ललितपुर, भक्तपुर र काभ्रेपलान्चोक सहित ४ जिल्लाका कुल १६ वटा टिमहरुले सहभागिता जनाउने आयोजकले बताएको छ । महेश्वरी खेलमैदानमा आयोजना हुने सो प्रतियोगिता कोरोना संक्रमणको जोखिमका कारण सम्पूर्ण तयारी पूरा गर्दा गर्दै गत माघ १४ गते स्थगित गरेको थियो । कोरोना सक्रमण कम भएसँगै स्थगित प्रतियोगिता राष्ट्रिय प्रजातन्त्र र शदीद दिवसको अवसर पारेर गर्न पाएकोमा झन आयोजकहरुलाई उत्साह थपेको आयोजकहरुले जनाएको छ ।
