राजनीतिक दलको भेला, सम्मेलन र महाधिवेशनले सङ्क्रमण दर बढाएको कतिपयको भनाइ ।।
उषा तामाङ, सीआइएन, काठमाडौँ
नेपालमा कोरोनाको तेस्रो लहर सुरु भएको आशंका विज्ञहरुले गरिरहँदा, कतिपयले त्यसको दोष राजनितिक दलको भेला, सम्मेलन र महाधिवेशनलाई दिएका छन् । केही दलका शिर्ष नेता कोरोना सङ्क्रमित भएर हाल आईसोलेसनमा छन् । छिमेकी देश भारतमा दैनिक डेढ लाखका दरले कोरोना सङ्क्रमित बढिरहँदा नेपालमा पनि बुधबार यता कोरोना सङ्क्रमितको सङ्ख्या निरन्तर बढिरहेको छ । दलहरूले गरेको भेला र सम्मेलनमा स्वास्थ्य मापदण्ड पालना नगरिएका कारण कोरोना फैलिएको ललितपुर हात्तिवनका रमेश रिजालले बताउनुभयो । दलहरूले देशभरका कार्यकर्तालाई एक ठाउँमा बोलाएर स्वास्थ्य सुरक्षाको मापदण्ड पालना नगरेका कारण निरन्तर सङ्क्रमण बढेको प्युठान घर भइ सतुङ्गल बस्दै आउनुभएका विष्णु प्रसाद पोखरेलले बताउनुभयो । डेढ महिना यता नेकपा एमाले, नेपाली काँग्रेस, माओवादी केन्द्र, राप्रपा, नेकपा समाजवादी पार्टी लगायतले केन्द्र देखि जिल्ला सम्मका भेलाहरु गरेका थिए । तर यसै कारण कोरोना फैलियो भन्न दलका नेताहरु भने तयार छैनन् । माओवादी केन्द्रकाअध्यक्ष पुष्पकमल दाहाल प्रचण्ड सहित करिब १२ जना केन्द्रीय नेतालाई कोरोना पुष्टि हुनुमा पार्टीको महाधिवेशन मात्रै जिम्मेवार नभएको नेता जयपुरी घर्तीले बताउनुभयो । सङ्क्रमण बढ्दै गएपछिदेशभरका विद्यालय गरिएको छ भने, स्वास्थ्य सुरक्षामा मापदण्ड पालना गर्न आग्रह गरिंदै आएको छ । तर दलहरुले अझै पनि आफ्ना भेला तथा कार्यक्रम रोकेका छैनन् । हाल कतिपय जिल्लामा एमालेको जिल्ला अधिवेशन चलिरहेको छ । कोरोना सङ्क्रमण बढ्दै जानुमा पार्टीको महाधिवेशन, यसबीचमा भएका विवाह सहित बढि भिडभाड हुने समारोह नै प्रमुख कारण भएको विशेषज्ञहरू बताउँछन् । परिक्षण गराउनेको सङ्ख्या पनि बढेकाले सङ्क्रमित बढि देखिएको सरुवा रोग विशेषज्ञ डाक्टर शेर बहादुर पुनले बताउनुभयो । दिनप्रतिदिन कोरोना सङ्क्रमितको सङ्ख्या बढेपछि सरकारले सार्वजनिक स्थलमा २५ जना भन्दा बढि व्यक्तिलाई भेला हुनबाट रोक लगाएको छ । तर राजनितिक दलका कार्यक्रममा सयौं मानिस भेला भईरहेका छन्, र उनिहरुले स्वास्थ्य सुरक्षाको मापदण्ड पनि पालना गरेका छैनन् ।
