नेपालमा उकालो लाग्दै कोरोना सङ्क्रमणको दरः २४ घन्टामा थपिए ३ हजार७५ नयाँ सङ्क्रमित ।
नेपालमा पछिल्लो एक सातादेखि कोरोना सङ्क्रमणको दर उकालो लाग्दै गएको छ । सरकारले सार्वजनिक गर्ने कोरोना सम्बन्धी तथ्याङ्कलाई केलाउँदा नेपालमा पछिल्लो एक सातादेखि कोरोना सङ्क्रमणको दर उकालो लाग्दै गएको देखिन्छ । एक सातामा कोरोना सङ्क्रमित थपिनेदर झन्डै २७ प्रतिशतले बढेको स्वास्थ्य तथा जनसङ्ख्या मन्त्रालयले जनाएको छ । आज मात्रै देशभर ३ हजार ७५ जनामा कोरोना सङ्क्रमण पुष्टि भएको छ ।
मन्त्रालयको नियमित कोरोना सम्बन्धी जानकारी दिने क्रममा प्रवक्ता डा.सङ्गिता मिश्र कौशलले गत २४ घन्टामा १३ हजार ३६ कोरोना परीक्षण गर्दा ३ हजार ७५ जनामा सङ्क्रमण पुष्टि भएको बताउनुभयो । उहाँका अनुसार नेपालमा हाल कोरोनाका कारण सङ्क्रमित हुनेको सङ्ख्या निरन्तर बढ्दै गएको छ भने निको हुनेदरमा कमी आएको छ । गत २४ घन्टामा देशभर रहेका सक्रिय सङ्क्रमितमध्ये २ सय ७८ जना स्वस्थ भएका छन् भने २ जनाको कोरोनाका कारण मृत्यु भएको छ । हाल देशभर सक्रिय सङ्क्रमितको सङ्ख्या ११ हजार ६ सय ९० रहेको छ ।
