यस बर्षको २४ औं भूकम्पीय सुरक्षा दिवस पाटन दरवार क्षेत्रमा मनाइने
काठमाण्डौ
“भूकम्पीय सुरक्षा सचेतना, सुरक्षित भवन सरचना” नाराका साथ यस वर्षको राष्ट्रिय भूकम्प सुरक्षा दिवस पाटन दरवार क्षेत्रमा मनाउने भएको छ । हरेक वर्ष माघ २ गते मनाउँदै आएको यस दिवसको मूल समारोह यस वर्ष पाटनमा आयोजना गर्ने भएको हो । शहरी विकास मन्त्रालयमा आज पत्रकार सम्मेलन आयोजना गरी सो दिवसको अवसरमा देशभर विभिन्न जनचेतनामूलक कार्यक्रम तर्जुमा भएको पनि जानकारी दिए ।
गत पुस २५ गते देखि नै भूकम्पीय सुरक्षा दिवसको अवसरमा कार्यक्रमहरु सुरु भएको भन्दै यस वर्ष माघ १५ गतेसम्म देशका विभिन्न क्षेत्रमा ५२ वटा कार्यक्रमहरु आयोजना हुने बताए । सरकारी तथा गैर सरकारी तवरबाट मनाईने सबै कार्यक्रमलाई राष्ट्रिय भूकम्प सुरक्षा दिवसका कार्यक्रमहरुको रुपमा लिएको छ । यस वर्ष २४ औ राष्ट्रिय भूकम्प सुरक्षा दिवसले कमजोर संरचना निर्माणका कारण भूकम्पको बेला बढी धनजनको क्षति भएकाले बलियो र सुरक्षित निमार्णलाई जोड दिएको छ ।
वि.सं १९९० सालको महाभूकम्प गएको समय माघ २ गते दिउँसो २ बजेकै समयमा मूल समारोह आयोजना गरी हरेक वर्ष राष्ट्रिय भूकम्प सुरक्षा दिवस मनाउदै आएको छ । गत वर्ष मध्यपुर थिमीस्थित कुमारी पाटीमा २३ औ भूकम्प दिवस मनाएको थियो । भूकम्पीय सुरक्षामा जनचेतना अभिवृद्धिका लागि यो दिवस प्रधानमन्त्री, गृह मन्त्री, भूकम्पविद्हरुको आतिथ्यतामा आयोजना हुँदै आएको छ । काठमाण्डौ उपत्यकामा मुल समारोह आयोजना गर्दै देशभर विभिन्न कार्यक्रम गरेर यो दिवस मनाईदै आएको छ । यस दिवसमा भूकम्प प्रविधि राष्ट्रिय समाज सहित विभिन्न संघ संस्थाले ब्यवस्थापन र सहभागिता हुँदै आएको छ ।
सो अवसरमा देशका ७७ जिल्लाका जिल्ला विपद् व्यवस्थापन समिति, रेडक्रस सोसाईटी सहित बिभिन्न संघ संस्थाहरु तथा स्थानीय तहहरुले पनि सचेतनामूलक गतिविधिहरु आयोजना गर्दै आएका छन् ।
