नेपालमा ४८ लाख भन्दा बढीले लिए राष्ट्रिय परिचयपत्र ।।
नेपालमा ४८ लाख भन्दा बढीले राष्ट्रिय परिचयपत्र लिएका छन् । राष्ट्रिय परिचयपत्र तथा पञ्जिकरण विभागका अनुसार परिचय पत्र लिनका लागि ५२ लाख नागरिकको विवरण प्रविष्ट गरिएकामा ४८ लाखको परिचयपत्र नम्बर जारी गरिएको हो । राष्ट्रिय परिचय पत्र देशैभरका जिल्ला प्रशासन कार्यालय सहित इलाका प्रशासन कार्यालयबाट लिन सकिने भएपनि काठमाडौँ जिल्ला प्रशासन कार्यालयमा बढी भीड लाग्ने गरेको छ । मङ्सिर १ गतेबाट सरकारले विद्युतीय राहदानी लागु गर्दा राष्ट्रिय परिचयपत्र नम्बर पनि अनिवार्य गरेपछि अहिले परिचय पत्र बनाउनेहरू बढेका छन् । काठमाडाँैमा नागरिकको भीड बढेपछि काठमाडौँ महानगरपालिकासहित १० वटा स्थानीय तहबाट पनि परिचय पत्र वितरण गर्ने व्यवस्था मिलाइएको राष्ट्रिय परिचयपत्र व्यवस्थापन शाखाका निर्देशक ललित कुमार बस्नेतले बताउनुभयो । राष्ट्रिय परिचयपत्र वितरण कार्य वडास्तरबाटै गर्ने लक्ष्यसहित विभागले २५ जिल्लामा अभियान सञ्चालन गरिसकेको छ भने १३ जिल्लामा जारी छ ।
