विश्व स्तनपान दिवसको अवसरमा भनपा १०मा आमा भेला
भक्तपुर, श्रावण २३ गते
विश्व स्तनपान दिवसको अवसरमा भक्तपुर नगरपालिका वडा नं. १०मा आमा भेला आयोजना गरेको छ । हरेक वर्ष अगष्ट १ देखि ७ तारिखसम्म मनाउने विश्व स्तनपान दिवसको समापनको दिन आमा भेला आयोजना गर्दै भनपा १० वडा कार्यालयले स्तनपानको महत्वका बारेमा अभिमुखिकरण गरेको थियो । शहरी क्षेत्रमा स्तनपान गराउने आमाहरुको संख्या कम भइरहेको बेला वडाका आमाहरुलाई भेला गरी बच्चा जन्मेको ६ महिनासम्म अनिवार्य रुपमा आमाको दुध खुवाउनु पर्ने तथा ६ महिना देखि २ वर्षसम्म बच्चालाई आमाको दुध सहित थप खाना खुवाउन सकिने विषयमा वडा नर्सहरुले प्रशिक्षण दिएको थियो । आमाको बिगौती दुधको महत्व बारे प्रकाश पार्दै आमाले आफ्ना बच्चाहरुलाई नियमित दुध खुवाउँदा बाल बच्चाको स्वास्थ्य पनि स्वस्थ हुने तथा आमाको स्वास्थ्य पनि राम्रो हुने भनाई राखेका थिए ।
