सङ्क्रमित थपिएसँगै अस्पताल भर्ना हुने दर पनि दोब्बरले बढ्यो, स्वास्थ्य मापदण्ड पालना गर्न आग्रह ।
नेपालमा पनि ओमिक्रोनको सङ्क्रमित बढिरहेकाले कोरोना सङ्क्रमितको सङ्ख्या बढिरहेको पाइएको छ । सङ्क्रमित थपिएसँगै अस्पताल भर्ना हुने दर पनि दोब्बरले बढेको कोभिड १९ युनिफाइड केन्द्रीय अस्पतालका प्रमुख प्रशासकिय अधिकृत प्रा. डा. भूपेन्द्रंकुमार बस्नेतले बताउनुभयो । काठमाडौं उपत्यकाका १३ र प्रदेशका ७ गरि २० वटै अस्पतालमा कोरोनाका विरामी अस्पताल भर्ना हुने दर एक हप्ता मै दोब्बरले बढेको उहाँले जानकारी दिनुभयो । भाइरसमा भएको उत्परिर्तनका कारण तिब्रगतिमा फैलिरहेको स्वास्थ्य तथा जनसङ्ख्या मन्त्रालयले जनाएको छ । यसकै कारण विश्वभर एक हप्तामा एक करोड जनामा कोरोना पुष्टि भएको छ ।
सरकारले सातै प्रदेशमा अक्सीजन प्लान्ट स्थापना गरेको जनाएको छ । स्वास्थ्य तथा जनसङ्ख्या मन्त्रालयका प्रवक्ता डा. मिश्राका अनुसार प्रदेश १ मा ११, प्रदेश २ मा ६, बागमतीमा २१, गण्डकीमा १७, लुम्बिनीमा १८, कर्णालीमा ७ र सदूरपश्चिममा ५ वटा गरी ८५ वटा अक्सीजन प्लान्ट निर्माण गरिएको हो । यस्तै कोरोना हुनबाट जोगिन नियमित साबुनपानीले हात धुने, व्यक्तिगत दूरी कायम गर्ने, भिडभाडमा नजाने लगायतका स्वास्थ्य मापदण्ड पालना गर्न पनि स्वास्थ्य तथा जनसङ्ख्या मन्त्रालयका प्रवक्ता डा. सङ्गिता मिश्राले अपील गर्नुभएको छ ।
