देशभर थप ६ जनाको कोरोनाका कारण मृत्यु, निको हुनेको सङ्ख्या ८ लाख नजिक ।
नेपालमा थप २ सय ९९ जनामा कोरोना भाइरसको सङ्क्रमण पुष्टि भएको छ । स्वास्थ्य तथा जनसङ्ख्या मन्त्रालयका अनुसार गत २४ घन्टामा देशभर ११ हजार १ सय ५२ कोरोना परीक्षण गर्दा २ सय ९९ जनामा सङ्क्रमण पुष्टि भएको हो । मन्त्रालयले सार्वजनिक गरेको कोरोना सम्बन्धी तथ्याङ्कमा गत २४ घन्टामा देशभर ७ हजार ८ सय ६३ आरटी पिसिआर विधिबाट कोरोना परीक्षण गर्दा २ सय ७२ जना र ३ हजार २ सय ८८ एन्टीजेन विधिबाट परीक्षण गर्दा २७ जनामा कोरोना पुष्टि भएको हो । योसँगै हालसम्म नेपालमा आरटी पिसिआर विधिबाट ८ लाख १८ हजार ३ सय ७ र एन्टीजेन विधिबाट ९५ हजार २ सय ५० जनामा कोरोना सङ्क्रमण देखिएको छ ।
यस्तै गत २४ घन्टामा देशभर रहेका सक्रिय सङ्क्रमितमध्ये २ सय ६० जना स्वस्थ भएका छन् । योसँगै नेपालमा कोरोना सङ्क्रमणपछि निको हुनेको सङ्ख्या ७ लाख ९९ हजार १ सय ७६ पुगेको छ । यस्तै गत २४ घन्टामा देशभर थप ६ जनाको कोरोनाका कारण मृत्यु भएको छ । योसँगै नेपालमा हालसम्म कोरोनाका कारण मृत्यु हुनेको सङ्ख्या ११ हजार ४ सय ८९ पुगेको छ । हाल देशभर सक्रिय सङ्क्रमितको सङ्ख्या ७ हजार ६ सय ४२ रहेको छ ।
