देशप्रेम र जेनजी पुस्ताको त्याग समेटिएको सांगीतिक प्रस्तुति ‘रगतको कण–कणमा’ सार्वजनिक
जनसञ्चार डेस्क
काठमाडौँ, २० कात्तिक
जेनजी आन्दोलनको बलिदान, देशले भोगिरहेको पीडा र युवापुस्ताको राष्ट्रप्रतिको अगाध प्रेमलाई समेटेर तयार पारिएको देशभक्तिपूर्ण गीत ‘रगतको कण–कणमा’ सार्वजनिक भएको छ। विजय भट्टको विशेष सहभागिता रहेको यस सांगीतिक कोसेलीले देशप्रेम, राष्ट्रभक्ति र परिवर्तनको बुलन्द आवाजलाई उजागर गरेको छ।
‘बीजे एन्ड द रिबेल्स’ (BJ And The Rebels) को सांगीतिक प्रस्तुति रहेको यस गीतमा नयाँ पुस्ता (Gen Z) को त्याग, बलिदान र देशप्रतिको उत्तरदायित्वलाई मुख्य विषयवस्तु बनाइएको छ। देशको वर्तमान परिस्थिति, युवाको भावना तथा समृद्ध राष्ट्र निर्माणको सपनालाई गीतको भिडियोमार्फत सशक्त रूपमा प्रस्तुत गरिएको छ।
स्लो रक शैली र सशक्त निर्माण
देशभक्तिपूर्ण स्लो रक (Patriotic Slow Rock) शैलीमा तयार पारिएको यस गीतमा स्वर, शब्द तथा संगीत ‘बीजे एन्ड द रिबेल्स’ कै रहेको छ। देशलाई माया गर्ने युवाहरूको भावना र राष्ट्रका लागि केही गर्नुपर्छ भन्ने सकारात्मक सन्देश दिनु गीतको मूल उद्देश्य रहेको छ।
गीतको भिडियोतर्फ:
- निर्देशन: सुमन बस्नेत
- छायांकन: उत्सव दाहाल
- सम्पादन तथा कलर ग्रडिङ: विकास दाहाल
- कोरियोग्राफी: सुरेन बस्नेत
टिकटक र युट्युबमा पाइयो दर्शकको साथ
‘जेनजी गीत २०२६’ (Gen Z Song 2026) का रूपमा बजारमा ल्याइएको यस गीतले सार्वजनिक भएसँगै सामाजिक सञ्जालमा चर्चा बटुल्न थालेको छ। विशेष गरी टिकटक तथा फेसबुक रिल्समा यसका भिडियो क्लिपहरूले दर्शकको उल्लेख्य ध्यान खिच्न सफल भएका छन् भने युट्युबमा पनि गीतलाई दर्शक तथा श्रोताले रुचाएका छन्।
परम्परागत देशभक्तिका गीतभन्दा फरक, रक संगीतको माध्यमबाट नयाँ पुस्ताको समर्पण र परिवर्तनको आकांक्षालाई जोड्ने प्रयासका रूपमा यस गीतलाई हेरिएको छ।
