अवैध माटो उत्खनन गर्ने जेसीबी नियन्त्रणमा, एक लाख रुपैयाँ जरिवाना
भक्तपुर, असोज ११। भक्तपुरको चाँगुनारायण नगरपालिकामा स्वीकृत अनुमति र तोकिएको मापदण्डविपरीत माटो उत्खनन तथा जग्गा प्लटिङ गर्न खोजिएको घटनामा संलग्न जेसीबीसहित सम्बन्धित पक्षलाई प्रहरीले कारबाहीका लागि नगरपालिका पठाएको छ।
जिल्ला प्रहरी परिसर भक्तपुरका अनुसार चाँगुनारायण नगरपालिका–४, नयाँ खोलिया क्षेत्रमा स्वीकृत नक्सा तथा अनुमति लिएर जग्गा प्लटिङ गर्ने क्रममा अनुमति दिइएको सीमाभन्दा बाहिर गई माटो उत्खनन गरेको पाइएको थियो।
उक्त घटनामा प्रयोग भएको जेसीबीसहित आवश्यक कारबाहीका लागि सम्बन्धित पक्षलाई प्रहरीले नियन्त्रणमा लिई चाँगुनारायण नगरपालिकाको कार्यालयमा पठाएको जिल्ला प्रहरी परिसर भक्तपुरले जनाएको छ।
नगरपालिकाले घटनामा संलग्न पक्षलाई एक लाख रुपैयाँ जरिवाना गरेको प्रहरीको प्रेस विज्ञप्तिमा उल्लेख छ।
अनुमतिबिना वा स्वीकृत मापदण्डविपरीत माटो उत्खनन तथा जग्गा प्लटिङ गर्दा कानुनी कारबाही हुन सक्ने भएकाले सम्बन्धित निकायबाट अनुमति लिएर मात्र यस्ता कार्य गर्नुपर्ने देखिन्छ।
