भक्तपुर कप फुटवल स्थगित
भक्तपुर, माघ १२
भक्तपुरमा माघ १४ गतेदेखि हुने भनिएको भक्तपुर कप फुटवल प्रतियोगिता स्थगित गरिएको छ । आयोजक युवा टिम गोल्मढी भक्तपुरले बुधबार पत्रकार सम्मेलन गरी प्रतियोगिता स्थगित गरेको जनाएको छ ।
पत्रकार सम्मेलनमा टिमका अध्यक्ष केशव त्वानाबासुले कोरोना भाइरसका कारण जनताको स्वास्थ्यलाई ध्यानमा राखी प्रतियोगिता हाललाई स्थगित गरेको जनाए । कोरोना भाइरसको महामरीमा कमी आई वातावरण अनुकुल हुनेवितिकै प्रतियोगिता पुनः सञ्चालन गर्ने जानकारी उनले गराए ।
आयोजक युवा टिमका संस्थापक अध्यक्ष एवं सल्लाहकार विश्वराम कवांले प्रतियोगिताका लागि धेरैले सहयोग गरेको भन्दै सहयोगी सवैप्रति धेरैधेरै धन्यवाद व्यक्त गरे । उनले प्रतियोगिता सुरु हुने बेला उक्त सहयोग पुनः प्राप्त हुने विश्वास व्यक्त गरे ।
युवा टिमका सल्लाहकार एवं भक्तपुर नगरपालिका वडा नं ७ का वडा अध्यक्ष उकेश कवांले प्रतियोगिता भावी दिनमा अझ वढी भव्य हुने विश्वास लिए । उनले प्रतियोगिता गर्नका लागि धेरैको सहयोग व्यक्त भएको भन्दै आगामी दिनमा पनि सहयोग हुनेमा आफू विश्वसस्त भएको बताए ।
युवा टिमका सचिव रामेश्वर मचामसी, भक्तपुर नगरपालिका वडा नं ७ का पूर्व वडा अध्यक्ष शिवनारायण ग्वाछा, युवा टिमका पूर्व अध्यक्ष तुल्सीनारायण ग्वाछालगायतको सहभागितामा कार्यक्रम भएको थियो ।
