बाढी र डुबानमा परेकाहरूको तत्काल राहत उद्धारको व्यवस्था गर्न गृहमन्त्रीलाई निर्देशन ।
प्रधानमन्त्री शेरबहादुर देउवाले देशका विभिन्न ठाउँमा आएको बाढीबाट प्रभावित भएकालाई तत्काल राहत तथा उद्धारको व्यवस्था गर्न गृहमन्त्री बालकृष्ण खाँणलाई निर्देशन दिनुभएको छ । आइतबारदेखिको अविरल वर्षाका कारण सुदूरपश्चिमलगायत देशका विभिन्न क्षेत्रमा धनजनको क्षति भएको र लाखौं मानिस प्रभावित भएको भन्दै उहाँले तत्काल राहत र उद्धारको व्यवस्था गर्न निर्देशन दिनुभएको हो ।
वर्षाका कारण भएको डुबानबाट हजारौं हेक्टरमा लगाइएको धान तथा अन्य बाली नष्ट भएको छ भने खेतीयोग्य जमिन बाढीले कटान गरेको छ । यसैबीच, सुदूरपश्चिमलगायत देशका विभिन्न भागमा परेको अविरल वर्षाका कारण कृषिमा भएको क्षतिको बारेमा अध्ययन गर्न कृषि तथा पशुपन्छी विकास मन्त्रालयले मातहतका निकायलाई निर्देशन दिएको छ । कृषि मन्त्रालयका प्रवक्ता प्रकाशकुमार सञ्जेलले बाढीका कारण कृषिमा भएको क्षतिको पूर्ण विवरण आउन बाँकी नै रहेको र मातहतका निकायहरूलाई क्षतिको विवरण संकलन गरेर पठाउन भनिएको पनि बताउनुभयो ।
