भक्तपुर नपा ८ वडाबासीबीच शुभकामना आदानप्रदान
२०७८ असोज २५ गते, सोमबार
भक्तपुर नगरपालिकाका प्रमुख सुनिल प्रजापतिको प्रमुख आतिथ्यमा भक्तपुर नगरपालिका वडा नं. ८ का वडाबासीहरुबीच आइतबार दशैंको उपलक्ष्यमा शुभकामना आदानप्रदान कार्यक्रम सम्पन्न भयो ।
कार्यक्रममा बोल्नुहु“दै नगर प्रमुख प्रजापतिले नेपालीहरुको महान् चाड बिजया दशैं मनाउनुको सामाजिक र सांस्कृतिक महत्व भएको बताउनुहुँदै दशैंसँगै निम्तिने आर्थिक तथा सामाजिक विकृतिबाट टाढा रहनुपर्ने बताउनुभयो ।
जनप्रतिनिधि जनताका असल मित्र हुन् र जनप्रतिनिधिले जनताको भावनाअनुसार काम गर्नुपर्नेमा जोड दिनुहुँदै उहाँले भक्तपुर नपाले समाजलाई सांस्कृतिक र राजनीतिक रुपले अगाडि बढाउने उद्देश्यका साथ अगाडि बढिरहेको बताउनुभयो ।
उहाँले फुर्सदको समयलाई प्रगतिशील तरिकाले सदुपयोग गर्न अनुरोध गर्दै जनतालाई समाजसेवी र स्वयम्सेवी भावनाले काम गर्न प्रेरित गर्नुपर्ने बताउनुभयो ।
भक्तपुर नपा वडा नं. ८ का वडाध्यक्ष महेन्द्र खायमलीले वडाबासीहरुलाई सामाजिक गतिविधिमा क्रियाशील राख्न वडाले विभिन्न कार्यक्रमहरुलाई प्राथमिकताका साथ अगाडि बढाउँदै आइरहेको बताउनुभयो । नेपाललाई विदेशीको उपनिवेश बनाउने ढंगले अगाडि ल्याइएको देशघाती एमसीसी सम्झौता कुनै पनि हालतमा अनुमोदन गर्न नदिन नहुने सचेत र देशभक्त जनता यसको विरोधमा आवाज उठाउनुपर्ने बताउनुभयो ।
नेमकिपा वडा नं. ८ का वडा इन्चार्ज कृष्णप्रसाद कोजुले युवाहरुलाई शारीरिक र मानसिक रुपमा स्वस्थ हुने गतिविधि सञ्चालनमा वडाले ध्यान दिनुपर्ने बताउनुहुँदै नयाँ पुस्तालाई सैद्धान्तिक र व्यवहारिकको खाँचो रहेको बताउनुभयो ।
कार्यक्रममा भक्तपुर नपा वडा नं. ८ का वडासदस्यद्वय पन्चमाया दुवाल र शिवप्रसाद बाला र वडा सचिव राजेश दिष्टीले पनि शुभकामना दिनुभएको थियो ।
