वागीश्वरीमा ११३औं अन्तर्राष्ट्रिय श्रमिक महिला दिवस मनाइयो
भक्तपुर, २४ फागुन
वागीश्वरी माध्यमिक विद्यालय कक्षा १२ को आयोजनामा ११३औं अन्तर्राष्ट्रिय श्रमिक महिला दिवस साहित्यिक तथा प्रवचन कार्यक्रमका साथ विहीवार मनाएको छ ।
कार्यक्रममा विद्यालयका प्रधानाध्यापक कृष्ण प्रसाद धन्छाले हरेक अभिभावकले आफ्ना छोराछोरीलाई सही शिक्षा दिएमात्रै व्यवहारिक र सही बाटोमा हिड्ने बताउनुभयो । उहाँले छोराछोरीलाई सही गन्तव्यमा पुर्याउन आमाबाबुले बेलैमा सचेत पार्नुपर्ने अन्यथा पछुटाउनुपर्ने बताउनुभयो । कानुन र संविधानले दिएको पर्याप्त अधिकारको सदुपयोग गर्नुपर्ने बताउँदै महिला पछि पर्नुको कारण महिला नै भएको उहाँको भनाइ छ ।
कार्यक्रममा शिक्षकहरु हरिप्रसाद बास्तोला, हिरालाल फुँयाल, प्रजापति खनाल, विद्यार्थीहरु रघुनन्दन महतो, विष्णुमाया तामाङ, विनिता कोइराला, अञ्जली बनमाला, सेलिजा सापकोटालगायतले नारी दिवसबारे स्पष्ट पार्नुभएको थियो ।
कार्यक्रममा कक्षा ११ र १२ का विद्यार्थीहरुले कविता, गीत, गजल, मुक्तक, निबन्धलगायतका विधा प्रस्तुत गरेका थिए ।
