आज कोरोनाका कारण १४ जनाको मृत्यु, १ हजार १ सय २८ जनामा सङ्क्रमण पुष्टि ।
नेपालमा कोरोना भाइरसको सङ्क्रमण दर घट्दै जाँदा मृत्युदर भने घट्न सकेको छैन । एक साता भन्दा बढि समयदेखि नेपालमा कोरोनाका सङ्क्रमित निरन्तर घटिरहेका छन् । तर सङ्क्रमित घटे अनुसार मृत्युदर भने कम हुन सकेको छैन । कोरोना सङ्क्रमणका कारण पछिल्लो २४ घण्टामा मात्रै १४ जनाको मृत्यु भएको छ ।
यस्तै हिजो पनि कोरोनाका कारण १२ जनाको मृत्यु भएको थियो । केही दिन यता दैनिक रुपमा १० जना भन्दा बढि सङ्क्रमितको मृत्यु भइरहेको छ । हिजोआजमा कोरोना सङ्क्रमित कम भएपनि पहिले नै सङ्क्रमित भएर अस्पताल भर्ना भएकाहरूको मृत्यु दर स्थि रहेको चिकित्सकहरूले बताएका छन् । पछिल्लो २४ घण्टामा १ हजार १२८ जनामा कोरोना भाइरस सङ्क्रमण पुष्टि भएको छ ।
स्वास्थ्य तथा जनसंख्या मन्त्रालयका अनुसार १७ हजार ४ सय ४७ पीसीआर परीक्षणमा जम्मा ६ सय ६६ जनामा सङ्क्रमण पुष्टि भएको छ । त्यस्तै तीन हजार ५४२ एन्टिजेन परीक्षणमा ४६२ जना गरी कुल १ हजार १२८ जनामा सङ्क्रमण पुष्टि भएको हो । त्यस्तै दुई हजार २१५ जना कोरोना सङ्क्रमणमुक्त भएका छन् । हाल देशभर कोरोना भाइरसको सक्रिय सङ्क्रमितको संख्या २७ हजार ४४१ जना रहेको छ ।
