नेपालमा कोरोनाभाइरस सङ्क्रमित मध्ये ८८ प्रतिशतमा ओमिक्रोन भेरियन्ट ।
नेपालमा कोरोना भाइरस सङ्क्रमित मध्ये ८८ प्रतिशतमा ओमिक्रोन भेरियन्ट पाइएको छ । विश्वप्यापी रुपमा डेल्टा भेरियन्टको सङ्क्रमणलाई ओमिक्रोन भेरियन्टले प्रतिस्थापन गरेजस्तै नेपालमा समेत सोही अवस्था देखिएको स्वास्थ्य मन्त्रालयका सहप्रवक्ता डा.समीर कुमार अधिकारीले आजको नियमित प्रेस ब्रिफिङमा बताउनुभएको हो ।
राष्ट्रिय जनस्वास्थ्य प्रयोगशालामा पछिल्लो समय देशभरबाट संकलित ३२ नमुनाको जिन सिक्वेन्सिङ गर्दा २८ नमुनामा ओमिक्रोन भेरियन्ट पुष्टि भएको मन्त्रालयले जनाएको छ । बाँकी ४ वटा नमुनामा डेल्टा भेरियन्ट पुष्टि भएको मन्त्रालयको भनाइ छ । नेपालमा भइरहेको पछिल्लो सङ्क्रमणमा एस–जीन पोजेटिभ भएपनि ८८ प्रतिशत ओमिक्रोन भेरियन्ट रहेको पाइएको डा. अधिकारीले बताउनुभयो ।
यसैबीच, पछिल्लो २४ घण्टामा थप ६ हजार ४६२ जनामा कोरोना भाइरस कोभिड–१९ को सङ्क्रमण पुष्टि भएको छ । स्वास्थ्य तथा जनसंख्या मन्त्रालयका अनुसार देशभरमा १७ हजार ४३७ नमुना परीक्षण गरिएको थियो । १३ हजार ३७७ नमुनाको पीसीआर परीक्षण गर्दा ५ हजार ५९८ र ४हजार ६० नमुनाको एन्टीजेन परीक्षण गर्दा ८६४ जनामा सङ्क्रमण पुष्टि भएको हो । पछिल्लो २४ घण्टामा १ हजार ४१६ जना सङ्क्रमणमुक्त भएका छन् भने ४ जनाको मृत्यु भएको छ । हाल देशभर ७७ हजार ४० संक्रिय सङ्क्रमित रहेका छन् ।
