२३ औं विविध भाषा साहित्य सम्मेलनको तयारी पूरा
मध्यपुर थिमी, बोडे, कार्तिक १८ गते
भाषा, कला र संस्कृति बचाऔं, राष्ट्रिय भावना जगाऔं उद्घोषका साथ मध्यपुर थिमीमा २३ औं विविध भाषा साहित्य सम्मेलन आयोजनाको तयारी पूरा गरेको छ । हरेक वर्ष नेपाल सम्वत्को न्हु दं (नयाँ वर्षको पहिलो दिन) मा मध्यपुर थिमीका विभिन्न टोलहरुमा आयोजना हुँदै आएको विविध भाषा साहित्य सम्मेलनको तयारी यस वर्ष बोडेको लाछि टोलमा हुने भएको हो । नेपाली जनताले गोवर्धन पूजा, नेवार समुदायले म्ह पूजा र नेपाल सम्वत् ११४२ न्हु दं मनाइ रहँदा मध्यपुर थिमीमा विविध भाषा साहित्य सम्मेलन हुँदै आएको छ । यस वर्ष विविध भाषा साहित्य सम्मेलनको २३ औं सृखलामा कोरोना संक्रमण जोखिम व्यवस्थापन गर्दै साहित्य वाचन र विभिन्न क्षेत्रका विज्ञहरुको विचार एवं मन्तव्य मात्रै प्रस्तुत गरिने आयोजक समिति विविध भाषा साहित्यिक समाजका अध्यक्ष सूर्यराम श्रेष्ठले जनाएको छ ।
चाड पर्वमा जुवा तास खेलेर युवाहरु विकृतमा रमाउने समयमा, सृजनशिलता र राष्ट्रिय भावना बुलन्द गराउन र साहित्य, भाषा, संस्कृति, शिक्षा, स्वास्थ्य, राजनैतिक रुपमा समेत सचेत र संगठित पार्न सो समाजको अगुवाईमा विविध भाषा साहित्य सम्मेलन तथा साँस्कृतिक ब्वज्या आयोजना हुँदै आएको अध्यक्ष श्रेष्ठले जनाए । यस वर्षको सम्मेलनमा नेपाल मजदुर किसान पार्टीका अध्यक्ष नारायणमान विजुक्छे, सचिव एवं सांसद प्रेम सुवाल सहित विभिन्न विषयका विज्ञहरुको सहभागितामा विचार गोष्ठिका साथै विभिन्न भाषा भाषिहरुको तर्फबाट साहित्य वाचन कार्यक्रम आयोजना गर्ने अन्तिम तयारी पूरा गरेको २३ औं विविध भाषा साहित्य सम्मेलनका अध्यक्ष सुरेन्द्र था श्रेष्ठले बताए । सम्मेलनमा सहभागि जनाएको उत्कृष्ठ साहित्यकारहरुलाई आकर्षक पुरस्कार वितरण गर्ने कार्यक्रम पनि रहेको अध्यक्ष श्रेष्ठले बताए ।
