नेपालमा कोरोनाका सक्रिय सङ्क्रमितको सङ्ख्या घट्दै, थप १३ जनाको मृत्यु ।
नेपालमा गत २४ घन्टामा थप १३ जनाको कोरोना सङ्क्रमणका कारण मृत्यु भएको छ । स्वास्थ्य तथा जनसङ्ख्या मन्त्रालयका अनुसार गत २४ घन्टामा देशभर रहेका सङ्क्रमितमध्ये थप १३ जनाको मृत्यु भएको हो । योसँगै देशभर कोरोनाका कारण मृत्यु हुनेको सङ्ख्या ११ हजार ३ सय ६१ पुगेको छ ।
यस्तै गत २४ घन्टामा देशभर थप ७ सय ७६ जनामा कोरोना भाइरसको सङ्क्रमण पुष्टि भएको छ । मन्त्रालयले सार्वजनिक गरेको कोरोना सम्बन्धी अद्यावधिक तथ्याङ्कमा गत २४ घन्टामा १० हजार ८ सय ६४ कोरोना परीक्षण गरिएको छ । गत २४ घन्टामा ८ हजार २ सय ८४ आरटी पिसिआर विधिबाट परीक्षण गर्दा ६ सय ७३ र २ हजार ५ सय ८० एन्टीजेन विधिबाट परीक्षण गर्दा १ सय ३ जनामा कोरोना सङ्क्रमण पुष्टि भएको छ । योसँगै हालसम्म देशभर आरटी पिसिआर विधिबाट ८ लाख ९ हजार ७ सय २९ जना र एन्टीजेन विधिबाट ९४ हजार १ सय १८ जनामा कोरोना सङ्क्रमण देखिएको छ ।
यस्तै गत २४ घन्टामा देशभर रहेका सक्रिय सङ्क्रमितमध्ये ५ सय १ जना स्वस्थ भएका छन् । योसँगै नेपालमा कोरोना सङ्क्रमणमुक्त हुनेको सङ्ख्या ७ लाख ८८ हजार ८ पुगेको छ । गत २४ घन्टामा देशभर ५७ हजार ६ सय १० जनाले कोरोनाविरुद्धको खोप लगाएका छन् । हाल देशभर सक्रिय सङ्क्रमितको सङ्ख्या १० हजार ३ सय ६० रहेको छ ।
