नेपालमा थप १६ सय जनामा कोरोना भाइरसको सङ्क्रमण पुष्टि, १० संक्रमितको मृत्यु, २ हजार १६१ जना संक्रमणमुक्त ।
नेपालमा थप १६ सय जनामा कोरोना भाइरसको सङ्क्रमण पुष्टि भएको छ । गत २४ घण्टामा ९ हजार ७६७ पीसीआर परीक्षण गर्दा १ हजार ३४७ जना र ३ हजार ६८८ को एन्टिजेन परीक्षण गर्दा २९३ गरी १ हजार ६४० जनामा कोरोनासङ्क्रमण पुष्टि भएको स्वास्थ्य तथा जनसंख्या मन्त्रालयले जनाएको छ । योसँगै नेपालमा सङ्क्रमण पुष्टि हुनेको सङ्ख्या ७ लाख ७३ हजार ५२९ पुगेको छ । सङ्क्रमण पुष्टि भएका मध्ये७ लाख ३३ हजार १६१ जना सङ्क्रमणमुक्त हुँदा १० हजार ८८९ जनाको भने मृत्यु भएको छ ।
मन्त्रालयका अनुसार पछिल्लो २४ घण्टामा कोरोना सङ्क्रमणबाट १० जनाको मृत्यु भएको छ भने २ हजार १६१ जना निको भएका छन् ।हाल देशभर २९ हजार ४७९ जना सक्रिय सङ्क्रमित रहेका पनि मन्त्रालयले जनाएको छ । जसमध्ये २७ हजार ६९० जना होम आइसोलेसनमा र १ हजार ७८९ जना संस्थागत आइसोलेसनमा छन् । कोरोनाका बिरामीमध्ये ४८८ जनाको आईसीयू र १४० जनाको भेन्टिलेटरमा उपचार भइरहेको छ ।
