भक्तपुरबाट प्रमुख जिल्ला अधिकारी हुमकला पाण्डेको बिदाइ
२०७७ मंसिर १० गते, बुधबार
भक्तपुरबाट गृहमन्त्रालयमा सरुवा भई जानुभएका प्रमुख जिल्ला अधिकारी हुमकला पाण्डेलाई आज एक समारोहबीच बिदाई गरियो । भक्तपुर नगरपालिकाको आयोजनामा भएको बिदाइ कार्यक्रममा नगर प्रमुख सुनिल प्रजापतिले उहाँलाई दोसल्ला ओढाई भक्तपुरको प्रसिद्ध मयुर झ्याल मायाको चिनोको रुपमा प्रदान गरी बिदाइ गर्नुभयो ।
बिदाई कार्यक्रममा नगर प्रमुख प्रजापतिले भक्तपुर नगरपालिका सार्वजनिक हितको निम्ति विभिन्न चुनौतीहरू सामना गर्दै अगाडि बढिरहेको बताउनुभयो ।
कोभिड महामारीबीच भक्तपुर नगरपालिकाले पारदर्शी ढंगले जनताको हितलाई प्राथमिकतामा राखी कार्य अगाडि बढाइरहेको बताउनुहुँदै उहाँले जनप्रतिनिधि, प्रशासन र स्थानीय जनताको संयुक्त प्रयासका कारण भक्तपुरमा कोरोना नियन्त्रणलगायतमा प्रभावकारी कामहरु भएको बताउनुभयो । भक्तपुर नगरपालिकाको कार्यसम्पादन देशभरिका स्थानीय तहहरुले हेरिरहेको हुँदा जनप्रतिनिधि र कर्मचारीहरुले अझ बढी सेवाको भावनाले काम गर्नुपर्नेमा जोड दिनुभयो ।
भक्तपुर क्यान्सर अस्पताल सरकारको मातहतमा सञ्चालन हुनु सकारात्मक भएको बताउनुहुँदै प्रमुख प्रजापतिले अस्पतालमा कार्यरत कर्मचारीहरुको व्यवस्थापनका विषयमा सम्बन्धित मन्त्रालयसमक्ष ध्यानार्षण गराइसकेको बताउनुभयो ।
भक्तपुर नपाका उपप्रमुख रजनी जोशीले जिल्ला प्रशासन कार्यालयले कोभिड नियन्त्रण र रोकथामलगायत विभिन्न क्षेत्रहरुमा भक्तपुर नपासँग प्रशंशनीय ढंगले समन्वय गरी काम गरिरहेको बताउनुभयो ।
कार्यक्रममा प्रजिअ हुमकला पाण्डेले भक्तपुरमा करिब १ वर्षको कार्यसम्पादनबाट आफू निकै सन्तुष्ट रहेको बताउनुहुँदै भक्तपुरको शिक्षा, स्वास्थ्य, विकास निर्माणलगायतका क्षेत्रमा भक्तपुर नगरपालिकाको कार्य प्रशंसनीय भएको बताउनुभयो ।
भक्तपुर नगरपालिकाले जिल्ला प्रशासन कार्यालयप्रति गरेको सद्भाव र समन्वयप्रति आभार प्रकट गर्दै प्रजिअ पाण्डेले भक्तपुर नपा ऐन, नियम र कानुन पालनामा अब्बल रहेको बताउनुभयो ।
भक्तपुरमा कोभिड १९ रोकथाम र नियन्त्रणका प्रयासहरु जनमैत्री भएको बताउनुहुँदै उहाँले भक्तपुरका ऐतिहासिक तथा सांस्कृतिक महत्व बोकेको जात्रा तथा पर्वहरु जनताकै सहभागितामा व्यवस्थित तरिकाले सम्पन्न हुनु सकारात्मक भएको बताउनुभयो ।
बिदाइ कार्यक्रममा भनपा वडा नं. ७ का वडाध्यक्ष उकेश कवांले पनि बोल्नुभएको थियो भने भक्तपुर नगरपालिकाका वडाध्यक्ष र कार्यपालिका सदस्य र भक्तपुर नपाका शाखा प्रमुखहरुको उपस्थिति रह्यो ।
