कोरोना संक्रमित १ लाख नाघ्यो, भक्तपुरमा आज १३० संक्रमित
काठमाण्डौ, असोज २३ गते
मुलुकमा कोरोना संक्रमित हुनेको संख्या १ लाख नाघेको छ । आज १३ हजार २७९ जनाको पीसीआर परीक्षण गर्दा थपिएका २ हजार ५९ जना संक्रमित सहित संक्रमित हुनेको संख्या १ लाख नाघेको हो । अहिले संक्रमितको संख्या १ लाख ६ सय ७६ पुगेको स्वास्थ्य तथा जनसंख्या मन्त्रालयले जनाएको हो । मन्त्रालयको नियमित पत्रकार सम्मेलनमा प्रवक्ता डा. जागेश्वर गौतमले पछिल्लो २४ घण्टामा १हजार ६ सय ८० जना कोरोना संक्रमण मुक्त भएसँगै कोरोना निको हुनेको संख्या ७३ हजार २३ पुगेको जनाएको छ । अहिले सक्रिय संक्रमितको संख्या २७ हजार ५३ जना रहेका छन् । क्वारेन्टिनमा भने ४ हजार ७०३ जना रहेको मन्त्रालयले जनाएको छ । अहिलेसम्म देशका विभिन्न प्रयोग शालाहरुबाट ११ लाख४५ हजार २३७ जनाको पीसीआर परीक्षण गरी सक्दा १ लाख ६७६ संक्रमित पुष्टि भएका हुन ।
मन्त्रालयको तथ्यांग अनुसार पछिल्लो २४ घण्टामा थप १० जना कोरोना संक्रमितको निधन भएको छ । मृत्यु हुनेहरुमा काठमाण्डौ जिल्लाका ८७ वर्षीय एक महिला र ७१ वर्षीय एक पुरुष, झापाका २१ र ५२ वर्षीय दुई पुरुष, सुनसरीका ४६, ५२ र ६८ वर्षीय तीन पुरुष र ललितपुर जिल्लाका ८४ वर्षीय एक पुरुष, रुपन्देहीका ४७ र ८४ वर्षीय दुई पुरुष रहेका छन् । योसँगै कोरोना संक्रमितको मृत्यु हुनेको संख्या ६०० पुगेको छ । अहिले भन्टिलेटरमा ७५ जना र आइसियूमा ३१८ जना उपचारमा रहेका छन् । हाल ५०० भन्दा बढी संक्रमित रहेका जिल्लाहरुमा काठमाण्डौ, ललितपुर, भक्तपुर, चितवन, रुपन्देही, सुर्खेत, मोरंग र सुनसरी जिल्ला छन् । मनांग र मुस्तांग जिल्ला भने कोरोना सून्य जिल्लामा छन् ।
आज काठमाण्डौ उपत्यकामा मात्र १ हजार ४ सय ९ जना संक्रमित भएका छन् । आज संक्रमति हुनेहरुमा काठमाण्डौ जिल्लाका मात्रै १ हजार ११६ जना, ललितपुर जिल्लाका १६३ जना र भक्तपुरका १३० जना रहेका छन्।
मन्त्रालयका प्रवक्ता डा. गौतमले कोरोना भाइरस संक्रमण वृद्धि भइरहेको बेला बृद्धहरुलाई चाँदै कोरोना सर्ने भएकाले यसपालिको दशैमा उनीहरुको आर्शिवाद अनलाईबाटै लिन भनिएको छ र नयाँ लुगा किन्न बजार जाँदा कोरोनाको जोखिम बढी भएकाले आफूसँगै भएका लुगा लगाउन पनि अनुरोध गर्नु भएको छ ।
