भक्तपुरका ३० जना सहित देशभर १०६९ संक्रमित, थप११ जनाको मृत्यु
भक्तपुर, भाद्र१६ गते
काठमाण्डौ उपत्यकामा ४८१ जना थप कोरोना संक्रमित हुँदा देशभर मंगलबार १ हजार ६९ जना संक्रमित भएका छन् । उपत्यकामा संक्रमितहरु मध्ये काठमाण्डौका ३९३, ललितपुरका ५८ र भक्तपुरका ३० जना संक्रमित भएका छन् । पछिल्लो २४ घण्टामा १२ हजार ८८ जनाको पीसीआर परीक्षण उपत्यकाका ४८१ जना सहित देशभरका १ हजार ६९ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ । योसँगै कुल संक्रमितको संख्या४० हजार ५२९ पुगेको छ भने २२ हजार १७८ जना निको भइसकेका छन् । मंगलबार मात्रै ७६८ जना कोरोना मुक्त भएका छन् । अहिले सक्रिय संक्रमित १८ हजार ११२ रहेका छन् । संस्थागत आइसोलेशनमा १० हजार ८३२ जना र हामे आइसोलेसनमा ७ हजार २८० रहेका छन् । विदेशबाट फर्केका ८ हजार ३९० जना विभिन्न क्वारेन्टिनमा रहेका छन् । संक्रमण निको हुने दर ५५ प्रतिशत रहेको मन्त्रालयका प्रवक्ता डा. जागेश्वर गौतमले जनाएको छ ।
कोरोना संक्रमणबाट गत २४ घण्टा भित्र थप ११ जनाको मृत्यु भएको पनि प्रवक्ता डा. गौतमले जनाएको छ । मंगलबार ४ वर्षीया बालिका सहित ११ जना कोरोना संक्रमितको मृत्यु भएको बताएको हो । मृत्यु हुनेहरुमा काठमाण्डौका ३४ र ६० , मकवानपुरका ५८, चितवनका ५२, सिराहाका ६५, पर्साका ५३,८० र ६०, बाराका ६०, महोत्तरीका ३७ वर्षीय पुरुषहरु र ४ वर्षीया बालिका समेत रहेका थिए । यो सँगै कुल मुत्यु हुनेको संख्या २३९ पुगेको छ ।
