काठमाडौँ, चैत २२ गते ।
एकै दिन तीन जनामा कोरना भाइरस संक्रमण पुष्टि भएको छ । योसँगै नेपालमा कोरना भइरस संक्रमित हुनेको संख्या ९ पुगेको छ । मुम्बइबाट फर्किएका कैलालीका २१ वर्षीय र उत्तराखण्डबाट फर्किएका कञ्चनपुरका ४१ वर्षीय पुरूष तथा कैलालीको ३४ वर्षीया महिलामा कोभिड–१९ को सङ्क्रमण देखिएको स्वास्थ्य तथा जनसङ्ख्या मन्त्रालयको इपिडिमियोलोजी तथा रोग नियन्त्रण महाशाखाका निर्देशक डा. वासुदेव पाण्डेले जानकारी दिएका छन् । ३४ वर्षीय महिला यसअघि कैलालीमा सङ्क्रमित भेटिएका पुरूषको आफन्त हुन् । यो नै पहिलो पटक नेपाल भित्रै देखिएको कोरना भाइरसको संक्रमण भएको छ । यो भन्दा पहिला विदेशबाट नेपाल आउनेमा मात्र कोरना भाइरसको संक्रमण भएको पुष्टि भएको थियो । आज पुष्टि भएका संक्रमित तीनै जनाको अहिले धनगढीस्थित सुदूरपश्चिम प्रादेशिक अस्पतालमा उपचार भइरहेको डा. पाण्डेले बताउनु भयो । आज संक्रमित व्यक्तिहरुको केही दिन अगाडी स्वाब संकलन गरी शुक्रबार परीक्षण गरिएको थियो । यो पुस्टिसंगै कोरना भाइरसको जांच थप प्रभाबकारी बनाउन आवश्यक देखिएको छ ।
