भक्तपुर, चैत्र २२ गते
लक डाउनको समयमा खाद्यान्न आपूर्ति व्यवस्थापनका लागि सहजिकरण समिति गठन भएको छ । भक्तपुरका ४ वटै नगरपालिकाहरुमा सो समिति गठनका लागि भक्तपुर उद्योग वाणिज्य संघले आफ्नो तर्फबाट संयोजकहरु चयन गरेका हुन । भक्तपुर नगरपालिकाका लागि संघका उपाध्यक्ष रोशन भोय्द्यो, मध्यपुर थिमी नगरपालिकाको लागि कार्यसमिति सदस्य राजभक्त श्रेष्ठ, सूर्यविनायक नगरपालिकाको लागि वरिष्ठ उपाध्यक्ष शिवप्रसाद मानन्धर र चाँगुनारायण नगरपालिकाका लागि कार्यसमिति सदस्य नविन प्रजापति संयोजक तोकिएको संघका महासचिव रोशनी धौभन्जाले शुक्रवार जारी गरेको विज्ञप्तिमार्फत जनाएको छ । भक्तपुर जिल्लाका स्थानीय नगरपालिकाहरुसँगको पटक पटकको छलफल पश्चात जिल्ला प्रशासन कार्यालय र महानगरीय प्रहरी परिसरसँगको समन्वयमा सो समिति गठन गरिएको हो । लक डाउनको समयमा औषधी, ग्यास, खाद्यान्न, सागसब्जी लगायत अति आवश्यक सामग्रीको आपूर्ति र ब्यवस्थापनकालागि वस्तुगत संघ संस्था र उद्यमी व्यवसायीसँगको छलफल र समन्वयबाट समग्र भक्तपुर जिल्लाको बजार सहजिकरण ब्यवस्थापनका लागि सो समिति गठन गरेको संघले जनाएको छ । जनप्रतिनिधी, प्रशासन र व्यवसायीसँगको समन्वयबाट आपूर्ति र बिक्रि व्यवस्थापन, मौजाद एव भण्डारणमा समितिले सहजिकरण गर्ने भनिएको छ । बजार व्यवस्थापनका लागि व्यवसायीले नियमित बजार खोल्नुपर्ने र व्यवसायीहरुको सुरक्षाको व्यवस्था हुनुपर्ने पक्षमा पनि जोड दिएको छ । संघका अध्यक्ष प्रदिप श्रेष्ठ सहित कार्यसमितिका पदाधिकारीहरुको नियमित समन्वयबाट सो समिति गठनसँगै जिल्ला प्रशासन कार्यालय र महानगरीय प्रहरी परिसर तथा खरिपाटी क्वारेन्टाइनलाई पनि खानेपानी, फुड प्याकिंग बक्स, प्लास्तिकका चम्चा लगायतका सामग्री सहयोग समेत गरेको विज्ञप्तिमा भनिएको छ ।
