ताथलीका ज्येष्ठ नागरिकलाई सहारा परियोजनाद्वारा नसर्ने रोगसम्बन्धी अभिमुखीकरण कार्यक्रम
१ मङ्सिर २०८२
ताथली, भक्तपुर
चाँगुनारायण नगरपालिका र नेपाल रेडक्रस सोसाइटी भक्तपुर जिल्ला शाखाको साझेदारीमा स्वीस रेडक्रसको आर्थिक सहयोगमा सञ्चालित स्वस्थ बुढ्यौैलीका लागि सहारा परियोजना अन्तर्गत वडा नं ९ को ताथली ज्येष्ठ नागरिक मिलन चौतारीको सहकार्यमा ज्येष्ठ नागरिकहरुका लागि नसर्ने रोगसम्बन्धी अभिमुखीकरण कार्यक्रम सम्पन्न भएको छ ।
कार्यक्रम चागुनारायण नगरपालिका वडा नं ९ को दुईवटा स्थानमा सञ्चालन गरिएको थियो । ताथली स्वास्थ्य चौकीसँगै रहेको रेडक्रसको उपशाखामा र भीमेश्वर मन्दिर फैढोकामा गरि दुई स्थानमा अभिमुखिकरण कार्यक्रम सञ्चालन गरिएकोे थियो । दुवै ठाउँमा गरेर ५५ जना जेष्ठ नागरिकको सहभागिता रहेको थियो । चाँगुनारायण नगरपालिकाकी कार्यपालिका सदस्य एवं वडा नं ९ का महिला वडा सदस्य सदस्य कमला भारती गिरीको प्रमुख आतिथ्यता सञ्चालित अभिमुखिकरण कार्यक्रममा ताथली स्वास्थ्यचौकी प्रमुख हरिनारायणप्रसाद शाह, ज्येष्ठ नागरिक मिलन चौतारीका अध्यक्ष रामप्रसाद मचामसीको उपस्थिति रहेको थियो । आफ्नो स्वागत मन्तव्य राख्नुहुदै कार्यपालिका सदस्य कमला भारतीले धेरै जस्तो ज्येष्ठ नागरिकहरू नसर्ने रोगको पीडाले ग्रसित भएको बताउनुभयो । उहाँले अस्वस्थकर खानपिन, बाताबरण प्रदुषण, बंशानुगत र शारीरिक व्यायाम कमीका कारणले पनि नसर्ने रोग बढ्दै गएको बताउनुभयो । कतिपय जेष्ठ नागरिकहरूलाई नसर्ने रोग भनेको के हो र सर्ने रोग कस्ता खालका हुन्छन् भन्ने कुरा पनि थाहा नभएको हुँदा यस प्रकारको अभिमुखिकरण कार्यक्रमले स्वास्थ्य सम्बन्धि सचेतना अभिबृद्धि गर्न मद्यत पुग्ने कार्यपालिका सदस्य कमला भारती गिरीले बताउनुभयो । उहाँले चाँगुनारायण नगरपालिकाले नगरबासीहरुलाई अक्सिजन र रगत निःशुल्क उपलब्ध गराउदै आएको कुरा समेत जानकारी गराउनुभयो । कार्यक्रमलाई अगाडि बढाउँदै ताथली स्वास्थ्य चौकीका हरिनारायण प्रसाद शाहले नसर्ने रोग भनेको के हो र नसर्ने रोग लाग्न नदिन र लागिसकेपछि के के गर्न सकिन्छ भन्ने बारेमा जेष्ठ नागरिकहरुलाई बताउनुभएको थियो । उहाँले मुटुको रोग, मधुमेह, क्यान्सर, मृगौलारोग र दमजस्ता नसर्ने रोगहरुको कारण, त्यसको रोकथाम तथा निराकणका उपायहरु बारेमा जानकारी गराउनुभएको थियो । स्वास्थ्य चौकीमा प्रायजस्तो आउने बिरामीहरू पनि नसर्ने रोगकै रहेको बताउनुभएको थियो । कार्यक्रमको समापनमा जेष्ठ नागरिक मिलन चौतारीका अध्यक्ष रामप्रसाद मचामसीले यस्ता कार्यक्रमले समाजलाई राम्रो सकारात्मक सन्देश प्रदान गरेको बताउँदै कार्यक्रम सञ्चालनमा सहयोग गर्नुहुने चाँगुनारायण नगरपालिका, वडा कार्यालय र नेपाल रेडक्रस सोसाइटीलाई धेरै धेरै धन्यवाद व्यक्त गर्नुभएको थियो । अभिमुखिकरण कार्यक्रममा नेपाल रेडक्रस भक्तपुर जिल्ला शाखाका स्वयंसेवक जयराम लामा र सुदीमा कार्की, वडा नम्बर ९ कि सहजकर्ता तुलसा नेपाल लगायत ज्येष्ठ नागरिक आमाबुबाहरुको सहभागिता रहेको थियो । चाँगुनारायण नगरपालिका स्वास्थ्य शाखासंगको समन्वयमा सहारा परियोजना अन्तर्गत नगरपालिका भित्रका सबै वडाहरुमा वडा तथा ज्येष्ठ नागरिक मिलन चौतारीको सहकार्यमा यस प्रकारको अभिमुखिकरण कार्यक्रमहरु सञ्चालन भइरहेकोछ ।
