डोलेश्वर प्रहरी चौकी कार्यालयबाट सेवा आजबाट पुनः सुरु
भक्तपुर, कार्तिक २२ गते
भक्तपुर जिल्ला प्रहरी कार्यालयका प्रमुख एसपी सूर्यवहादुर खड्काले जेन्जी आन्दोलनले आगजनी भएको डोलेश्वर प्रहरी चौकी पुनःनिर्माण भएपछि आज उद्घाटन गर्नु भएको छ । जगाती प्रहरी वृत्त पुननिर्माण समितिको आर्थिक भौतिक सहयोगमा मर्मत सम्भार पूरा गरेपछि आज सो चौकीको उद्घाटन भएको चौकीका प्रमुख शिव निरौलाले जनाएको छ । कार्यालय भवन जलेपछि निजी घरबाट सेवा दिनुपर्दा असज महसुस गरी विभिन्न व्यक्ति संस्थाहरुको सहयोग जुताएर मर्मत सम्पन्न भएपछि आजबाट कार्यालयबाटै सेवा दिन सक्ने भएको उहाँले बताए । भोलीबाट फेरी सिसि क्यामेरा सहित थप प्रभावकारी रुपमा सेवा विस्तार हुने गरी कार्यालय मर्मत तथा सरसफाई गरी कार्य सञ्चालनको तयारी भएको उहाँले बताए । डालेश्वर मन्दिर, नैचाल आसपासका समुदायको शान्ति सुरक्षाकालागि सो चौकी गत वर्ष मात्रै निर्माण गरी सञ्चालनमा आएको हो । पुनःनिर्माण समितिका अध्यक्ष कृष्णराम जाकीका अनुसार जगाती प्रहरीको पुनःनिर्माणसँगसँगै डोलेश्वर प्रहरी चौकी पनि पुनःनिर्माणमा सर्वसाधारणहरुको तर्फबाट सहयोग जुताएर पुनः सेवा प्रारम्भ भएको बताउनु भयो । ऐतिहासिक डोलेश्वर मन्दिर र स्थानीय समुदायको शान्ति सुरक्षाको महत्वलाई झल्काएर चौकीको पुनःनिर्माण गरी पुनः सञ्चालनमा ल्याउन सहयोग गर्ने सबैमा समितिका अध्यक्ष जाकीले धन्यवाद व्यक्त गरेका छन् । जिल्ला ट्राफिक कार्यालयको सेवा भने विभिन्न कारणले आज प्रारम्भ गर्न नपाएकोमा भने उहाँले दुःख व्यक्त गरे । समितिका कोषाध्यक्ष एवं स्थानीयवासी राकेश थापाले चौकी पुनः सञ्चालनमा आएपछि स्थानीय समुदाय र डोलेश्वर मन्दिरको संरक्षणमा महत्वपूर्ण योगदान पुगेको बताउनु भयो । जनताको शान्ति सुरक्षाकालागि जनताकै सहयोगमा चौकी पुनः सञ्चालनमा आउँदा स्थानीय जनता लाभावित हुने उहाँले बताउनु भयो ।
