नवौं भक्तपुर औद्योगिक मेला सम्पन्न, भोलि विशेष साँस्कृतिक कार्यक्रम हुने
भक्तपुर, बैशाख ७ गते
नवौ भक्तपुर औद्योगिक, सांस्कृतिक, पर्यटन, कृषि तथा व्यापार महोत्सव व्यापारकोलागि मात्र नभई सामाजिक अभियानको लागि पनि भएको भन्दै सूर्यविनायक नगरपालिकाका प्रमुख बासुदेव थापाले विक्रेता र उपभोक्ता बीच एकता कायम गर्ने महोत्सव भएको बताएका छन् । हरेक वर्ष आयोजना हुँदै आएको महोत्सवले आपसी मेलमिलापका लागि सम्पूर्ण सामग्री एक्कै ठाउँमा पाउने व्यवस्था गरेको जनाएको छ । महोत्सवबाट गरेको आम्दानीबाट क्यान्सर रोगीलाई सहयोग र कलाकारहरुलाई सम्मेत सम्मानित गरेको चर्चा गर्दै सो अवसरमा वरिष्ठ गितकार शुभाष चन्द ढुंगेललाई सम्मानित गरेको थियो । गत चैत्र २८ गते सांसद दुर्लभ थापाले उद्घाटन गरेको सो महोत्सवको आज नगर प्रमुख बासुदेव थापाले औपचारिक रुपमा समापन गरेका हुन । सो अवसरमा विशेष अतिथिको रुपमा नेकपा एमाले भक्तपुरका अध्यक्ष वचत देउजाले एउटै ठाउँमा धेरै चीजहरुको मेला हुनु राम्रो पक्ष भएको बताएका थिए । कार्यक्रममा सूर्यविनायक नगरपालिकाका उपप्रमुख सरिता भट्टराई सहित, भक्तपुरका क्रियाशिल पत्रकारहरुको आतिथ्यतामा समापन कार्यक्रम आयोजना गरेको थियो । सो अवसरमा महोत्सवका क्रममा आयोजित नृत्य प्रतियोगिताका विजेताहरुलाई पुरस्कृत गर्नुका साथै विभिन्न कलाकारहरुबाट साँस्कृतिक कार्यक्रम पनि प्रस्तुत गरेको थियो ।
१ सय ५० भन्दा बढी स्थलहरु रहेको सो महोत्सवको अवसरमा ३ लाख भन्दा बढीले अवलोकन गर्नुका साथै ४ करोड भन्दा बढी कारोवार भएको आयोजक समितिका सयोजक दिपक थापाले अनुमान गरेको छ । समापन पश्चात बैशाख ८ गते विशेष साँगितिक कार्यक्रमको आयोजना हुने संयोजक थापाले जनाएको छ ।
