बखानपुर भन्दा पहिला बनेपामा सहकारी सञ्चालनमा आएको खुलासा
भक्तपुर, माघ १५ गते
जनहित बहुउदेश्य उपभोक्ता सहकारी संस्था लि.ले आफ्नो १० औं वार्षिक साधारण सभाको अवसरमा सदस्य आवास योजना घोषणा गरेको छ । आज सल्लाघारी सपिङ्ग कम्प्लेसमा आयोजना भएको सो साधारण सभाले अध्यक्ष राध्येश्याम सुवालको अध्यक्षतामा नयाँ कार्य समिति समेत चयन गरेको छ । सो अवसरमा साधारण सभाको उद्घाटन गर्दै भक्तपुर जिल्ला बचत तथा ऋण सहकारी संघका अध्यक्ष कृष्ण गोविन्द लाखाजुले सहकारी संस्थालाई दीगो बनाउनकालागि शेयर पूजी २५ प्रतिशत भन्दा बढी पुर्याउनुपर्नेमा जोड दिदै नेपालमा वखानपुर सहकारी भन्दा पहिल्यै विस २००० मा बनेपामा सहकारी सञ्चालनमा आएको प्रष्ट पार्नु भयो । सहकारी अभियानमा विस.२०१३मा बखानपुरलाई नेपालमा पहिलो सहकारी स्थापनाको ईतिहास भनिए पनि त्यो भन्दा पहिल्यै बनेपामा सहकारी सञ्चालनमा आएको कुरा खुलेको बताउँदै उहाँले परापूर्वकाल देखिको धर्मशास्त्रहरुमा समेत विपद्मा बचत गर्ने नियम रहेको चर्चा गर्नु भयो ।
४४० सदस्य रहेको सो सहकारी संस्थाले इच्छुक सदस्यहरुलाई महिनाको ५ हजार वा सदस्यको क्षमता अनुसार बचत अभियान सञ्चालन गरी सदस्य लक्षित आवास योजना बनाउने भन्दै अध्यक्ष राध्यश्याम सुवालले महिनाको ५ हजार जम्मा गरेको ६ वर्षमा रु.१० लाख फिर्ता दिने हिसावले संस्थाको कारोबार बलियो बनाउँदै जाने कार्ययोजना सुनाउनु भयो । संस्था सञ्चालनको ३ वर्ष भित्र नाफामा सञ्चालन गर्ने योजना भएपनि कोरोना सक्रमणको जोखिमले योजनाबद्धरुपमा कार्य सम्पादन गर्न नसकिएको जानकारी दिदै आगामी दिनहरुमा सदस्य हितका गतिविधिहरुलाई प्राथमिका दिने बनाउनु भयो । सो संस्थाले जनहित मल्टी स्टोर पनि सञ्चालन गर्दै आएको छ ।
