कोरोना सङ्क्रमित हुने दर दैनिक रुपमा बढ्यो ।
कोरोना सङ्क्रमित हुने दर दैनिक रुपमा बढेको छ । पछिल्लो २४ घण्टामा ९६८ जनामा कोरोना भाइरस सङ्क्रमण पुष्टि भएको छ । स्वास्थ्य तथा जनसङ्ख्या मन्त्रालयका अनुसार पीसीआर र एन्टिजेन गरी १४ हजार ९७१ परीक्षणमा ९६८ जनामा सङ्क्रमण पुष्टि भएको हो ।कोरोना सङ्क्रमणका कारण पछिल्लो २४ घण्टामा भने कसैको पनि मृत्यु भएको छैन । आज सङ्क्रमणमुक्त हुनेको संख्या भने २६२ रहेको छ । हाल देशभर कोरोना भाइरसको सक्रिय सङ्क्रमितको संख्या ५ हजार ७४१ रहेको छ । पछिल्लो २४ घण्टामा काठमाडौं जिल्लामा मात्रै २८४ जनामा कोरोना देखिएको छ ।
यसैबीच, नेपालमा थप २४ जना व्यक्तिमा कोरोनाको ओमिक्रोन भेरियन्ट पुष्टि भएको छ। आज स्वास्थ्य तथा जनसङ्ख्या मन्त्रालयले विज्ञप्ति जारी गर्दै देशभरबाट सङ्कलित नमूनाहरूको सिक्वेन्सिङ गर्दा थप २४ जनामा ओमिक्रोन पुष्टि भएको जानकारी दिएको छ। २४ जनामा ओमिक्रोन भेरियन्ट पुष्टि भएसँगै सरकारले अस्पतालहरुलाई तयारी अवस्थामा रहन निर्देशन दिएको छ । डेल्टा भेरियन्टको तुलनामा ओमिक्रोन सङ्क्रामक भएकाले धेरै मानिस सङ्क्रमित हुनसक्ने भन्दै सरकारले अस्पतालहरुलाई तयारी अवस्थामा रहन निर्देशन दिएको हो । स्वास्थ्य तथा जनसङ्ख्या मन्त्रालयले विज्ञप्ति जारी गरी अत्याधिक बिरामीको चापलाई थेग्न सक्ने गरी तयारी अवस्थामा रहन अस्पतालहरुलाई निर्देशन दिएको छ ।
मन्त्रालयले पूर्ण रुपमा जनस्वास्थ्यका मापदण्ड पालना गर्न आग्रह गर्दै सहि तरिकाले हात धुन, मास्कको प्रयोग गर्न, बारम्बार हात धुन तथा दुई मिटरको दूरी कायम गर्न समेत सर्वसाधारणहरुलाई आग्रह गरेको छ ।पुस महिनामा सङ्कलित एक हजार १ सय ४३ पोजेटिभ नमूनाहरूको सिक्वेन्सिङ गर्दा २४ जनामा ओमिक्रोन पुष्टि भएको मन्त्रालयले जनाएको छ । सीमामा परीक्षणलाई थप सशक्त बनाइएको र पोजेटिभ भएकाहरूलाई आइसोलेसनमा राख्ने व्यवस्था गरिएको पनि मन्त्रालयलय बताएको छ । पछिल्लो समय भारतमा सङ्क्रमण व्यापक फैलिएपछि त्यसको असर नेपालमा पनि देखिन सुरू भएको छ।
