१ करोड १६ लाखले कोरोनाविरुद्धको पहिलो मात्रा खोप लगाए ।।
सरकारले सुरु गरेको कोरोनाविरुद्धको खोप अभियान अन्तर्गत कम्तिमा एक मात्रा खोप लगाउनेको सङ्ख्या १ करोड १६ लाख नाघेको छ । ११ महिनाको अवधिमा सरकारले लिएको लक्ष्य अनुसार कुल जनसङ्ख्याको १ करोड १६ लाख २९ हजार ६ सय २१ जनालाई कम्तिमा पनि एक मात्रा खोप लगाइसकिएको स्वास्थ्य तथा जनसङ्ख्या मन्त्रालयले जनाएको छ । यो लक्षित १ करोड ९९ लाख २२ हजार १ सय ६४ जनाको ५८ दशमलव ४ प्रतिशत हो । यस्तै ९३ लाख ६५ हजार ९ सय १५ जनाले कोरोनाविरुद्धको दुवै मात्रा खोप लगाइसकेका छन् । अहिलेसम्म कुल जनसङ्ख्याको ३८ दशमलव ३ प्रतिशतले एक मात्रा र ३० दशमलव ८ प्रतिशतले पूर्ण मात्रा खोप लगाइसकेका पनि मन्त्रालयले बताएको छ । हिजोमात्रै देशभर २५ हजार २३ जनाले कोरोनाविरुद्धको खोप लगाएका मन्त्रालयका प्रवक्ता डा.कृष्ण प्रसाद पौडेलले सीआइएनसँग बताउनुभयो ।
