भोली फुलकोर्ट बैठक बोलाउन आग्रह गर्ने असन्तुष्ट सर्वोच्च अदालतका न्यायधिशहरूको निर्णय ।
सर्वोच्च अदालतका असन्तुष्ट न्यायाधीशहरूले भोली फुलकोर्टको बैठक बोलाउन आग्रह गर्ने निर्णय गरेका छन् । आज बसेको असन्तुष्ट न्यायाधिशहरूको बैठकले यो निर्णय गरेको हो । प्रधानन्यायाधीश चोलेन्द्र शमशेर जबरा बाहेकका न्यायधिसहरूको आज बैठक बसेको हो । बैठकले भोलि फुलकोर्ट बैठक बोलाएर मंसिर १५ गतेदेखि गोलाप्रथा लागू गर्ने गरी अघि बढ्न माग गर्ने निर्णय गरेको हो ।अघिल्लो साताको फुलकोर्टले पेसी व्यवस्थापन गोलाप्रथाबाट गर्ने निर्णय गरेको थियो ।
त्यसलाई १५ मंसिरबाट कार्यान्वयनमा लैजानका लागि सूचना प्रकाशनलगायतका आवश्यक तयारी गर्ने निर्णय आजको बैठकले गरेको हो । न्यायाधीशहरूले यस विषयमा सर्वोच्च प्रशासनका कर्मचारीहरूसँग समेत छलफल गरेका थिए । पछिल्लो निर्णयअनुसार सर्वोच्चमा पेसी तोक्ने काम प्रधानन्यायाधीशले एकल रुपमा नभएर पेसी व्यवस्थापन निर्देशन समितिले गर्नेछ । उक्त समितिको अध्यक्षता भने प्रधानन्यायाधीशले नै गर्नेछन् । प्रधानन्यायाधीशले समितिको अध्यक्षता गर्ने गरी भएको नियमावली संशोधनमा न्यायाधीशहरू आफैं अल्मलिएका थिए । यद्यपि, उनीहरू निर्णय कार्यान्वयनमा लैजान तयार भएका छन् ।
