राष्ट्रपति भण्डारीद्वारा काँग्रेसका सभापति देउवा प्रधानमन्त्रीमा नियुक्त ।
नेपाली काँग्रेसका सभापति शेरबहादुर देउवा प्रधानमन्त्रीमा नियुक्त हुनुभएको छ । उहाँलाइ आज राष्ट्रपति विद्यादेवी भण्डारीले प्रधानमन्त्रीमा नियुक्त गर्नुभएको हो । सर्वोच्च अदालतले आज ५ बजे सम्म देउवालाई प्रधानमन्त्री नियुक्त गर्न परमादेश दिएको थियो । सोही अनुसार राष्ट्रपतिले आज दिउँसो देउवालाई प्रधानमन्त्री नियुक्त गरेको राष्ट्रपतिका स्वकीय सचिव भेषराज अधिकारीले जानकारी दिनुभयो । शपथ ग्रहण साँझ ६ बजेका लागि तोकिएको छ ।
यसैबीच, नेकपा माओवादी केन्द्रले नेताहरु जनार्दन शर्मा र पम्फा भुसाललाई सरकारमा पठाउने निर्णय गरेको छ । माओवादी केन्द्रका अध्यक्ष प्रचण्डले काँग्रेस सभापति तथा नवनियुक्त प्रधानमन्त्री शेरबहादुर देउवासँग छलफल गरेपछि माओवादीका तर्फबाट दुई मन्त्रीको टुंगो लागेको हो । उनीहरुको मन्त्रालयबारे भने टुंगो लागेको छैन । आजै प्रधानमन्त्री देउवाको शपथ ग्रहण लगत्तै मन्त्रीहरुको पनि शपथ हुनेछ ।
