कोरोनाले थप १६को मृत्यु, भक्तपुरमा थपिए ७४ संक्रमित, १००५ कोरोना मुक्त
भक्तपुर, असोज ५ गते
पछिल्लो २४ घण्टामा गरिएको ९ हजार ५३३ जनाको कोरोना परीक्षणमा भक्तपुरका ७४ जना संक्रमित देखिएका छन् भने देशभर १ हजार १५४ जना थप संक्रमित भएका हुन । संक्रमितहरु मध्ये ६७४ जना काठमाण्डौ उपत्यका भित्रकै रहेका छन् । काठमाण्डौ जिल्लाका २१३ महिला र ३२५ पुरुष गरी ५३८, ललितपुरमा ३१ महिला र ३१ महिला गरी ६२ जना र भक्तपुर जिल्लाका ३० महिला र ४४ पुरुष सहित ७४ जना थप संक्रमित भएका हुन ।
देशभरका ४९ वटा प्रयोगशालामा अहिलेसम्म ९ लाख २३ हजार ८२३ जनाको पीसीआर परीक्षण सम्पन्न गर्दा ६५ हजार २७६ जनामा कोरोना पोजेटिभ देखिएको उल्लेख गर्दै स्वास्थ्य तथा जनसंख्या मन्त्रालयका प्रवक्ता डा.जागेश्वर गौतमले पछिल्लो २४ घण्टाभित्र १ हजार ५ जना कोरोना संक्रमण मुक्त भएको बताएका छन् । योसँगै संक्रमण मुक्त हुनेको संख्या ४७ हजार २३८ पुगेको छ । कोरोना संक्रमण मुक्त हुने दर ७२ प्रतिशत रहेको छ । हाल १७ हजार ६११ जना सक्रिय संक्रमितहरु आइसोलेसनमा रहेका छन् । क्वारेन्टिनमा हाल ७ हजार ४०३ जना रहेका छन् भने आइसीयूमा १९६ जना उपचारमा छन् । भेन्टिलेटरमा ३१ जना रहेको प्रवक्ता गौतमले बताए । कोरोना संक्रमणबाट सोमबार थप १६ जना मृत्यु भएको सँगै मृत्यु हुनेको संख्या ४२७ पुगेको छ ।
